Executive日記——東鐵出軌遲大到 日資員工被質問 攞定「延誤證明書」 唔怕老細詐型

  最近咁多示威衝突同突發事件,影響交通,Kelly覺得港鐵嘅反應都好快,盡早通知乘客列車能否行駛,令人預早行,但就算搭到列車,都唔知下站到唔到度,依家俾Kelly發現咗列車因突發事故受阻,乘客係可以向港鐵攞張「延誤證明書」㗎 ,咁就唔怕老闆懷疑啦!

  九月份發生咗東鐵紅磡站出軌事件,社交媒體facebook群體「奴工處」有網民發文話,自己喺日資公司打工,喺東鐵出軌嗰日遲咗大到,就同日本上司申請會遲到,點知俾埋新聞做證明,俾上司越洋來電質疑佢:「點解同事返到你返唔到?」

  佢解釋咗係列車出事,但上司唔放過佢,想知詳情:「……係咪真係全線停運、幾分鐘有一班、邊度開、邊度停……」樓主心諗,我返貿易公司咋,唔係返MTR呀!此發文一出,即有一眾當日受害網民冒出回應,有網民表示「同日資打工流淚揮手區 」、有人更指「日資真係好可怕」、亦有精明網民表示「因為日本鐵路出現意外而延遲班車的話,會喺車站出口派發『遲到證明文件』畀有需要人士,所以個日本老闆先會咁問」。

  一言驚醒夢中人!Kelly就事件向港鐵查詢,香港有冇呢種遲到證明?港鐵回應,原來佢哋係有呢個服務,如果大家遇到列車突發事故,可以向職員攞張「延誤證明書」,或者自己上港鐵網頁申請就都得。有咗「延誤證明書」,就唔怕老闆問長問短啦!

Kelly Chu


hd