Executive日記——《指環》四部曲成就驕人 港樂獲《留聲機》大獎 晉身世界一流樂團

  呢幾個月充斥負面消息,昨天終於爆出一單喜訊。香港管弦樂團(港樂)擊敗多隊著名嘅樂團,榮獲2019年「年度樂團大獎」,仲係亞洲首隊獲此殊榮嘅樂團。Kelly同一眾樂迷收到英國傳來呢個好消息,開心都飛起,大叫Bravo!

  港樂喺英國倫敦舉行、被譽為「古典音樂的奧斯卡」嘅《留聲機》雜誌頒獎典禮中,榮獲「年度樂團大獎」,表揚港樂喺古典音樂藝術上嘅傑出成就,仲喺過去一年發行咗重要嘅唱片專輯。

  所講嘅唱片專輯,係由音樂總監梵志登(見圖)幹勁十足嘅帶領下,港樂展開為期四年嘅浩瀚旅程,演出華格納巨著《指環》四部曲歌劇音樂會,並作現場錄音。

   《留聲機》雜誌總編輯曹占士評論話:「由梵志登指揮、拿索斯現場灌錄的《指環》四部曲,成就驕人,致令全球眾多樂迷投票給這支出色嘅亞洲樂團。」梵志登話︰「港樂締造了歷史,我們引以自豪。」

  呢個獎有幾重要,睇吓同港樂競逐嘅九個優秀樂團,包括柏林國家交響樂團、波士頓交響樂團、哥德堡交響樂團、倫敦交響樂團、三藩市交響樂團、法國世紀樂團等,就知道港樂好勁,已晉身世上最優秀嘅樂團之一。

  Kelly喺現場聽過港樂《指環》音樂會,精采至極,港樂實至名歸。好多樂迷都恭喜港樂,其中一個話;「港樂出色,值得有一個全新嘅演奏廳。」Kelly舉手支持。政府聽唔聽到呀?

Kelly Chu


hd