Executive日記——成身似着火 醫生唔識醫 毛漢好火滾 雙腳藍印洗唔甩

  印度協會前主席毛漢(Mohan Chugani)周日路過尖沙咀清真寺,被警方水炮車噴出嘅藍水射中,無喇喇當殃,佢同Kelly話,清洗咗十幾次,昨日雙腳依然洗唔甩啲藍色,佢要求政府向全港公私營醫院通報藍水嘅成份,等醫生知道點樣處理中招者嘅不適,當然仲要洗走身上啲藍色「烙印」啦。



  毛漢當日唔係去遊行,亦唔係示威者,但警方水炮車向佢狂噴藍水,佢憶述當時情況,仍然好火滾,「成身好似著火咁,雙眼打不開,做咗起碼半小時盲公!」當時有好心人帶佢去清真寺清洗咗幾次,佢即時打電話俾浸會醫院嘅私家醫生,想睇急診,點知個醫生有疑難,叫佢唔好嚟,原來醫生都唔知藍水嘅成份,唔知點醫。

要求公開藍水成份

  毛漢好勞氣咁同小妹講︰「警方唔洗做到咁絕對惡毒嘅,係可以用藍水射啲非法示威者,以便拉人,但都要講俾全港醫生知藍水係乜,以便抒解中招者嘅不適,呢個係應該做嘅。」佢打咗個比喻︰「俾蛇咬,都要知係乜蛇,先有得救!」聽到小妹笑咗。佢要求特首同警務處長快啲向全港醫生通報藍水嘅成份。至於佢嘅情況,冲咗十幾次涼,猛摔身上嘅藍跡,至昨天雙腳仍是藍的,真無奈。

Kelly Chu


hd