Executive日記——辭任迪士尼樂園高職 蔡少綿尋找新奇妙旅程

  喺香港迪士尼樂園舉行大型活動,都會見到樂園嘅傳訊及公共事務副總裁蔡少綿(Linda),佢親身上台向公眾推廣,好似化身奇妙嘅代言人咁。小妹八卦到,Linda喺迪士尼樂園打拼咗六年多之後,喺月前向公司請辭,計劃先休息充電,同時思考一下事業嘅新方向。

  Linda事業上多次出入傳媒、政府和企業,曾做過AO,亦獲委任為問責官員,今次係佢第二次喺香港迪士尼樂園工作,喺過去六年多時間,處理過樂園就興建第三間酒店嘅財務重組,以及總值一百零九億元樂園新階段擴建計劃嘅港府撥款。兩項都關係到樂園長遠發展,經歷咗漫長而又艱鉅嘅磋商同立法會審批過程。

  除咗幕後,幕前嘅參與同樣精采。好似香港迪士尼獨有嘅Marvel設施,包括「鐵甲奇俠飛行之旅」同「蟻俠與黃蜂女:擊戰特攻!」,由籌備到開幕嘅宣傳,奠定咗香港喺漫威宇宙的定位。佢仲經常喺內地和東南亞市場出現,尤其喺高鐵同港珠澳大橋落成前後,穿梭中港,向內地推廣香港迪士尼樂園。

  呢六年半,置身樂園,瓣瓣精采。據聞,佢喺暫別奇妙旅程前,會喺公司多留一會,處理手頭項目,稍後去旅行,諗吓未來事業有咩新挑戰。聽聞,已經有獵頭公司向佢招手。

Kelly Chu


hd