Executive日記——新藝潮博覽展出逾百新晉藝術家作品 才子醉心繪畫 「神童」問鼎國際賽

  近日因應社會事件,好多活動及展覽都叫停。不過,第三屆新藝潮博覽會就如常舉行,為大家呈現來自世界各國藝術家嘅精采作品,紓緩心情。Kelly噚日都去咗睇,藉以陶冶性情,仲喺芸芸參展商中,發現「大才子」陶傑,同有「畫壇神童」之稱、年僅十三歲嘅劉見之嘅身影!

  陶傑同小妹講,佢除咗寫作外,仲對繪畫有濃厚興趣,會趁海外旅行嘅時候,四處畫下風景畫、炭筆畫同水彩畫等。而劉見之就參加喺北馬其頓同保加利亞舉辦嘅國際繪畫比賽,仲邀請一班參賽同學同比賽主辦人到場觀展。劉見之仲賣咗四幅畫,用作參加該兩個比賽嘅資金。

  Kelly提提大家,今屆新藝潮博覽會,由即日起至本月四日,喺中環PMQ元創方舉行。博覽將帶來超過一百名來自世界各地新晉獨立藝術家嘅作品,涵蓋街頭藝術、水墨、油畫、混合媒體、雕塑等,大家仲可以同藝術家見面溝通,機會難得!現場亦有新媒體同岩彩畫,歡迎大家一齊加入藝術盛事!

Kelly Chu


hd