Executive日記——「浮游之樂」戶外藝術裝置展覽 霸氣 「海龍王」 飛躍沙螺灣

  Kelly有幾個朋友去完日本瀨戶內海藝術節返嚟,話喺幾個小島上欣賞藝術裝置,心靈大洗滌咁話。小妹冇時間去日本,但發現香港都有類似嘅戶外藝術裝置展覽活動,其中一件展品有成七米高,氣勢不凡。

  由註冊慈善團體「誇啦啦藝術集匯」舉辦嘅第二屆大型戶外藝術節--「浮游之樂」藝動沙螺灣,喺嚟緊周六周日免費開放畀市民參觀,屆時大家會見到一個高七米高嘅海龍王裝置藝術品,豎立於沙灘上,好似從大海躍起咁,打卡一定好有feel。另一件由本地得獎建築師所設計嘅作品,以竹為材料,外形有如水滴,用美學呈現不同國家用水量。

  一家大小又可以喺「浮游之樂」穿梭鄉村、參加說故事同手工藝工作坊、看自造小船起航、聆聽結合水同瑜伽嘅音樂表演。喜歡冒險嘅參加者可以參加刺激嘅張保仔海戰圖版遊戲,與對手一較高下,跟隨導賞員漫步村落。小妹諗起都開心,約緊好友去玩番一轉。

免費報名:https://bit.ly/2m1Qhy0

Kelly Chu


hd