Executive日記——服務25年先有資格攞 會展 「老臣子」 獲贈閃爆金會展

  Kelly上個禮拜去灣仔會展中心出席一年一度商會嘅盛大聯合午宴,碰見會展管理公司董事總經理梅李玉霞 ( Monica),恭喜佢獲公司頒發長期服務獎,原來佢喺會展服務咗二十五個年頭,獲公司頒發一座閃閃生光嘅足金會展做紀念品,表揚佢對會展嘅貢獻。

  早前灣仔會展中心舉行周年員工晚會,Monica同另外十二名同事一齊獲頒長期服務獎,每個人拿着一個金會展,開心合照留念。擺到呢個金會展,一啲都唔簡單,必須喺會展管理公司服務滿二十五年,夠晒長情,亦反映各人喺行內嘅專業地位,舉足輕重。

  Monica喺酒店服務及場地管理業擁有超過三十年嘅豐富經驗,每事親力親為,每逢會展有展覽或大型活動,大家都會見到佢親自落場,與同事一起服務賓客。厲害嘅係,大家都知會展面積好大,但愛穿高跟鞋嘅Monica一樣健步如飛,全場走,帶領同事,絕無難度,會展界一姐之名,實至名歸。

Kelly Chu


hd