Executive日記——又一山人作品展 細味香港情懷

  Kelly一直都好欣賞本地設計師黃炳培(又一山人)嘅設計,尤其係別具本港特色嘅一系列紅白藍尼龍帆布作品。文化博物館由即日起至明年三月九日,舉行「時間的見證/又一山人 X 黃炳培/四十年創意展」,回顧黃炳培過去四十年嘅商業設計同藝術創作,展現佢多才多藝、努力不懈同熱愛香港嘅情懷。

  Kelly知道呢個展覽後,當然唔會錯過,第一時間先睹為快。呢個展覽主要分為黑、白、灰三個部份,匯集設計、攝影、藝術、電影、文字等媒介,展示黃炳培嘅藝術創作,包括其跨越近二十年嘅「正面香港」《紅白藍》系列,平面設計同廣告創作,以至從企業社會價值出發嘅品牌推廣項目。展覽首次展現多組大型攝影作品,以及最新嘅攝影日記《80/20‧明心見性‧四十年》。

  值得一提嘅係,喺展覽期間,文化博物館仲特別邀請黃炳培擔任講座講者同帶領導賞,亦會播放由佢執導嘅電影《冇照跳》,並舉辦導演映後分享,即場交流創作心得。有興趣嘅你,千萬唔好錯過!

Kelly Chu


hd