Executive日記——紅十字會心理熱線 助千多人解鬱結

  Kelly同好多朋友一樣,見到社會衝突事件持續升溫,好唔開心,好想搵人傾訴吓。如果大家心中有鬱結,唔好唔理,可以去搵香港紅十字會幫忙,該會由六月中起持續向市民提供緊急心理支援熱線服務。會方對Kelly話,臨牀心理學家同受過訓練嘅義工已為逾二千一百人提供急救及心理支援服務,每個救助人嘅個人資料同內容都會保密。

  紅十字會對Kelly講,因反修例風波而情緒受困擾嘅求助人,來自不同年齡層、姓別、職業,當中有記者、警察、家長、學生等等,佢哋當中包括有或沒有直接參與活動嘅人士,出現唔同程度嘅情緒反應,普遍感到驚恐、憤怒、擔憂及傷心。各人喺接受心理支援服務後,求助人均表示情緒狀態較為緩和。

  其中一個求助人係一位女士,佢致電紅十字會,話曾喺港鐵站遇到衝突場面,其後每次經過港鐵站都感到十分恐懼,甚至出現失控流淚,動彈不得嘅情況,經會方心理支援服務的協助後,佢了解到自己嘅情緒反應並學習了一些紓緩情緒嘅方法,情緒狀態較為緩和。

  Kelly呼籲大家,若心中有鬱結,感到自己情緒異常,唔好收埋,應該搵專家幫手,可以透過香港紅十字會心理支援服務 「Shall We Talk」 WhatsApp ︰ 5164 5040 、Telegram ︰ @hkrcshallwetalk,發出短訊,預約服務。

Kelly Chu


hd