Executive日記——富豪熱心爆棚 黃志祥自發清理 「戰場」

  流行歌詞話︰「努力興建,盡情破壞」,反映當下香港嘅情況。昨日油尖旺區不少道路上佈滿磚頭同雜物,有市民自發清理,信和置業主席黃志祥亦加入自發清潔行列,相片仲喺網上瘋傳。

  油尖旺區前晚變成戰區,路上佈滿磚頭,阻礙車輛行駛。信和置業主席黃志祥昨日乘車駛經尖東麼地道時,主動下車,拾起路邊雜物,呢位富豪嘅舉動,被人拍攝下來,好多網民都大大讚,直言「佩服」。

  Kelly亦要讚下一眾清潔工人,即使油尖旺多條街道好似戰地咁,但示威者深夜離去後,清潔工人就出動,默默咁掃清雜物,第二日早上就可以順通行車,呢班幕後英雄,值得大家拍掌鼓勵。

Kelly Chu


hd