Executive日記——「五個裸女」三億元破紀錄 常玉裸女畫作系列長拍長升

  香港經濟陷入技術性衰退,但藝術品投資市場一片興旺。喺前日嘅佳士得香港秋季拍賣會上,旅法華人畫家常玉畫作「五個裸女」以天價三千九百多萬美元,相當於港幣三億元成交,刷新常玉畫作嘅最高拍賣價紀錄,但好多收藏家認為「五個裸女」冠軍寶座唔會坐得好耐,因為蘇富比會喺明年推出常玉另一裸女傑作「綠色背景四裸女」,屆時又可能創新高賣價。



  近年常玉嘅裸女畫,喺拍賣會掀起熱潮,早前先有一幅名為「曲腿裸女」,喺蘇富比拍賣會以一億九千萬港元拍出,成為藝術投資界熱話。但前晚常玉嘅「五個裸女」喺佳士得開拍,唔單止係常玉尺幅最大嘅裸女油畫,更係人物數量最多,五個裸女企喺度,當然勝一個曲腳瞓喺度嘅裸女啦,最後以港幣三億元拍出,佳士得可謂贏番蘇富比一仗。

  但蘇富比似乎不甘後人,上周先宣佈推出常玉裸女畫作「綠色背景四裸女」,將領銜蘇富比明年春拍,由於此畫「堪稱常玉裸女群像中最媚惑吸引之巨作」,好多人相信到時又會超過「五個裸女」嘅售價。蘇富比同佳士得兩大拍賣行較勁嘅意味,相當濃厚。

  Kelly就覺得,經濟不景,有錢一族搵潛力大嘅投資,藝術品成為佢哋爭奪嘅對象,尤其係中國畫家嘅作品,因為中國市場大,所以競爭激烈,長拍長升。

Kelly Chu


hd