Executive日記——農曆花車巡遊變嘉年華 旅發局新總幹事 程鼎一谷消費計仔多

  反修例風波下旅客大減,多個行業蒙受損失。新任旅發局總幹事程鼎一諗緊計仔,力挽狂瀾。佢透露,正籌備一項推廣活動,結集全城優惠,給港人同駐港海外人士一齊享用。佢亦視乎安全情況,續辦冬日節同元旦煙花倒數兩項跨年盛事。至於農曆新年,將搞搞新意思,首次搞新春嘉年華會。

  返工近一個月嘅程鼎一透露,十月同十一月訪港旅客數字續跌,比去年同期減少四成以上,所以要諗計應對。構思中嘅推廣活動,參加嘅業界包括航空公司、旅行社、酒店、景點、餐廳、商戶、商場,甚至小店都會大派優惠,除了旅客享用,港人同駐港嘅海外人士亦受惠,希望由香港出發,帶動海外親友及其他熱愛香港嘅旅客來港。

  局方亦正籌備冬日節、除夕倒數及新春匯演三項跨年盛事,但會考慮公眾安全同留意社會環境,作相應安排。冬日節會由十二月十一日至明年一月一日喺中環皇后像廣場舉行,將擺放由國際團隊操刀設計、高十八米嘅聖誕樹,外表呈半透明狀,配以LED燈同霓虹燈帶,大家仲可以走進聖誕樹內玩番轉。

  至於元旦維港煙花匯演,每年吸引多個國際傳媒直播,凸出香港嘅國際形像。程鼎一話,會視乎安全情況,希望續辦,有需要時,會邀請一啲制服團體,協助人流管制。

  佢仲話,農曆新年花車巡遊搞咗二十四年,加上明年係鼠年,所以計劃將花車巡遊升級,變成由年初一至年初四舉行嘅大型新春嘉年華會,除了繼續會有國際表演隊助陣,亦會加入更多嘉年華元素,例如美食、大型裝飾擺設,讓大家盡情打卡,地點仍在物色中。Kelly希望大家多啲喺聖誕新年內部消費,自己開心,也可以提振本土經濟。

Kelly Chu


hd