Executive日記——寬敞平地改建 減少影響生態 舒適環形座椅設計 西灣觀星零死角

  西貢比較少受光污染影響,適合觀星。建築署早前按漁護署嘅要求,喺西貢西灣與鹹田灣之間已廢棄嘅營地上承建觀星設施,供大家可以舒服咁躺下,仰望滿天星宿。Kelly諗起都覺得好浪漫。

  呢個觀星地點,係由露營地改建而成,位於一個小山丘上,由西灣沙灘沿麥理浩徑二段步行上山,約十分鐘便看到「西灣觀星地點」嘅路牌。新建觀星設施係一座由玻璃纖維強化樹脂板組成嘅環形座椅,強化樹脂板堅固耐用,適合在露天位置使用;座椅更按四周樹線形態建造,流線形的設計,融入大自然當中,十分美觀。

  建築署建築師盧宜璋話,該處原為一個舊營地,本身係一塊寬敞嘅平地,改建工程唔需要砍伐樹木,把對生態同景觀影響減至最輕微。佢又話,觀星設施嘅設計,由漁護署、太空館同建築署共同研究,工程喺一八年十月展開。項目最大嘅特色係環形座椅,環狀嘅設計能做到360度無死角觀星,即是無論坐喺邊個位置,都能看到星空。座椅形態則根據人體工學設計,讓人以最舒適的135度坐姿仰望星空,較躺在地上觀星更為舒適。座椅則採用淺色系,頂部和底部都加上反光物,令遊人在沒有照明嘅情況下也能清楚看到座椅的位置,保障安全。

  另外,觀星設施的中央部份是一個硬鋪平面,讓觀星人士放置腳架和望遠鏡,地面嵌入鋼製座標,方便使用者辨別方向,欣賞不同方位嘅星空。觀星設施今年三月正式開放,可容納約三十人同時使用。該項目今年更榮獲日本的「優良設計獎(Good Design Award)」及意大利「A'國際設計大獎賽」金獎兩項國際殊榮。

Kelly Chu


hd