Executive日記——救護車增設自動心外壓機 增病患存活率

  呢幾個月社會發生好多衝突,消防處嘅急救車經常出動,救急扶危。唔講唔知,消防處嘅急救車服務,到今年已經踏入第一百年,其間不斷提升服務嘅質素。喺今年十月仲喺所有救護車增設自動心外壓機,增加心臟停頓病人嘅存活率。

  消防及救護學院副院長(救護訓練)吳孝銘介紹自動心外壓機,話呢個設備可以為心臟停頓的病人持續施行心外壓急救,唔受外界因素如道路顛簸、車廂狹窄等干擾,亦唔會因為救護人員體力不支而中斷急救。

  有咗呢個機械裝置,救護員就可以有多雙手,為病人做更多救活服務。吳孝銘話︰「以機器取代人手的另一好處,救護人員可在病人送院途中,為病人做更多治理程序,如注射腎上腺素和高級氣道處理。」

  大家想了解消防處救護服務喺過去一百年來嘅歷史同變遷,可以上網搜尋 「消防及救護教育中心暨博物館」,透過網頻預約,就可以去設於將軍澳百勝角「消防及救護學院」內嘅「消防及救護教育中心暨博物館」,內有四層嘅展示廳,分別有「消防歷史沿革區」 、 「消防及救護車輛展覽區」 、 「社區應急準備教育」 、 「重大事故區」 及「英雄閣」等。Kelly有時間都要去參觀下,學多啲急救冷知識。

Kelly Chu


hd