Executive日記——海洋公園新機動遊戲吸客 熊貓未能「添丁」李繩宗感遺憾

  海洋公園行政總裁李繩宗上周會見傳媒,分享佢服務公園二十五年嘅點滴。作為將大熊貓引入香港嘅一份子,佢對園內未有熊貓BB出生感到有小小遺憾咁話。佢透露,面對反修例風波帶嚟嘅挑戰,公園將推出新嘅機動遊戲、全新燈光匯演「光影盛夜」及水上樂園,保持吸客嘅競爭優勢。

  李繩宗憶述,一九九四年從加拿大回流返港,加入海洋公園擔任財務總監,當時以為只任職兩三年,但發現喺公園工作好有趣,就一直留任至今。佢指,好高興能喺入職初期,參與引進國寶大熊貓到港,又對公園動物團隊,由咩都唔識,到成為飼養、管理大熊貓嘅專家,感到好驕傲!不過,大熊貓盈盈、樂樂多年來,經自然及人工繁殖都未能「添丁」,佢都覺得有小小遺憾。

  佢坦言,反修例風波是其上任以來,所面臨嘅最大挑戰,將加強本地市場推廣,公園喺聖誕活動期間推出全新機動遊戲;明年一月推出全新燈光匯演「光影盛夜」,以迎合夜間旅遊需求;而明年落成嘅全天候水上樂園,環山面海,設計前衛,相信會成為本港新地標。

  李繩宗將於明年六月下旬退休,佢形容公園如同佢嘅屋企,過去只請過少於十日病假,每朝都七點幾、八點就返到公園,對退休感到好唔捨得。佢希望退休後到以做一啲有意義、有意思、自在嘅事,亦可能會繼續從事自然保育工作。Kelly希望佢退休後可以好好享受生活!

Kelly Chu


hd