鍊金手記——運氣不足 輸就要縮

  前輩驃叔有云:「賭馬屬偏門,偏門又使咩講道理?」就算分析如何專業、賽前功課做得如何充足,到頭來能否贏錢,總不能欠缺運氣。

  馬迷其實與騎練一樣,都有手風順逆之時,手風順時隨便亂買都能命中,影相次次影贏。手風欠順時,全日「買W跑P,買P第四」,相信不少馬迷亦有過類似經驗。

  筆者參與賽馬投注的年資不淺,當然深明此道,可惜始終道行未夠深,總會重複犯錯,明知運氣不在依然強要投注,結果自然全軍覆沒。

  「贏要谷、輸要縮」,雖然從來知易行難,但亦是注碼運用的一個好練習。「贏谷」或許只屬錦上添花,倒不如先學習「輸縮」,在感覺運氣欠佳時,就放棄當日賽事。到季尾結算時,或發現可省回不少冤枉錢。

燈神

hd