名人戰商界——樓市升太快買唔到樓 吳業坤用老婆本開西裝店

        吳業坤(坤哥)去年成為「新人王」,年中更首踏紅館開個唱,人氣、財富同樣迫人來!捱咗六年終算有啲成績,坤哥唔敢飄飄然,反而要居安思危,因為藝人生活朝不保夕,所以坤哥趁26歲仔年輕力壯好好打拼,重錘投資6位數字學做西裝生意:「鋪定後路啫,將來自己同媽咪都有個依靠!」

        介紹大家「食好西」係坤哥強項,但做西裝生意就係門外漢,不過,他竟然將第一桶金合共數十萬投資西裝店Baron Tuxedo,他解釋:「係朋友提議搞呢門生意,其實我哋兩個都係行外人,不過用一年時間去考慮、觀察同埋做過市場調查,發覺只係用$3000已經可以度身訂製一套西裝好有商機,一定好受年輕準新郎歡迎,其次自己出好多event經常着得到,可以做埋生招牌,而且好多年輕演員好似蕭正楠、陳國鋒都啱着,咁樣可以互相幫助收到宣傳效用。」

後生仔咩都試吓

  坤哥本身係一間拉麵店小股東,今次重本投資佔一半股份,連老婆本都押下。所以凡事親力親為,不時落店打躉:「試業期間先體會到原來做生意好多嘢要學,唔係只得買賣西裝技巧咁簡單,好似點去服務客人、布料種類、營運方法、甚至同員工交心等,依家我仲係學習中。客人中多數係同媽咪一齊嚟嘅年輕準新郎,同佢哋接觸多咗,真係學到唔少嘢。」坤哥形容今次係人生大事:「本想儲錢買樓,但樓市升得太快跟本追唔上,又唔可以攬住啲錢過世,26歲仔仲後生咪試吓。」





採訪:方騫平

hd