名人戰商界——7位數開髮型屋 DJ瑪姬狂搵朋友撐場

        DJ及主持瑪姬簽約王祖藍旗下經理人公司後,工作不斷,最近更榮升老闆娘,跟髮型師表弟Roy及朋友合資7位數,在大埔開設髮型屋「Looks」,不過首次投資兼負責店舖宣傳的她,相當緊張,落力邀請一班藝人朋友幫襯,特別是住在大埔的老闆王祖藍及李亞男夫婦,更願意贊助他們一世,務求搞旺個場。

本身不懂整頭髮的瑪姬,今次膽粗粗敢投資,只因撐表弟Roy,「表弟做咗髮型師8年,一直想開自己舖頭,我都想投資咪一齊搞,加上佢有班朋友,大部份都係髮型師嚟,已經有批熟客,唔使太愁生意問題,試業時反應都唔錯。」

望一年回本

  至於揀選較偏的大埔區,因表弟和朋友以往都在該區工作,「股東啲熟客都喺呢區多,加上呢區租金比較巿區平,啱啱創業比較適合,不過呢度租落先知,電力唔係太夠,所以我哋要專登買個煤氣爐,呢方面都花咗一筆錢,未做過老闆真係唔知咁多,今次係一個好好嘅經驗。」

  不過瑪姬都有信心一年至年半可回本,「我哋揀呢條街,就係貪靜中帶旺會有新客嚟,好似隔籬就有間學校,啲媽咪送完仔女返學可以嚟整頭,之後再湊番佢哋都得。同埋我已經call齊一班藝人朋友嚟幫襯,特別係老闆祖藍同老闆娘亞男佢哋都係住大埔,佢哋多啲嚟當宣傳,我贊助佢哋一世都無問題㗎!」

採訪:杜淑霞

hd