名人戰商界——投資餐飲業損失過千萬 孫耀威再戰商場提倡潮着西裝

        早年孫耀威(Eric)在上海和台北投資餐飲業失利慘蝕過千萬,但收拾心情企穩陣腳後,他雄心不滅,決定投資千萬連開兩間西裝舖,成立自家品牌TUXEE,實行跟西裝老闆蘇志威(阿細)及吳業坤分一杯羹!經過兩次蝕到入肉嘅經歷,Eric坦白承認:「其實我對做生意完全冇興趣,我只係對設計有興趣,就係因為咁驅使我再次跌入火坑!做西裝唔係賺大錢生意係當做娛樂,因為量唔多,但好似BB咁,見到好靚仔會好冧,公司能自負盈虧後我希望喺設計上可以玩吓嘢。」

        孫耀威位於商場2樓的西裝店成為遊人及同行的「地標」,唔少人過來影相「觀戰」,因為門口放置了一件由他設計,價值3萬元,用多層布條組成的黑白色西裝樣辦,不論布料、製作時間、重量都比一般的多出幾倍,真係好有玩嘢Feel,咁花時間、功夫及金錢,行內人一定唔會咁癲,他竟然滿足地說:「我攞一塊貴布料剪到咁碎去造西裝,每條闊度約一吋厚,逐條逐條黐上去似做一塊布咁,單係師傅釘製布料過程都需時3個月,雖然係好多層,但全部布料100%純wood,加上用特製技術去做到通爽效果,好正㗎。有位長髮高大威猛嘅美國商人好鍾意,訂咗一套着上台演講,佢要求用色係全世界最姣嘅姣婆紫,我見到完成品都好興奮。」

玩西裝會沉迷

  近年由歌壇轉攻商界的孫耀威表示,TUXEE與其他高級定製店與別不同的是能夠衝破傳統的框框,設計上會喜歡玩布料,玩撞色,即使好老正款式及布料,只要花小小腦筋可以做到好潮,仲會加入顧客天馬行空嘅意念,如造過蜘蛛網水晶西裝。問到造西裝還是唱歌的滿足感較大?他笑說:「我着住自己西裝唱歌滿足感最大,好似送畀老婆陳美詩首《It's My Day》咁,曲詞編監衫都係我,代表到由內心出發做件事。我覺得,一個真正鍾意玩西裝嘅人好似女人玩鑽石咁會好沉迷,覺得自己靚仔兩倍,着到件合身嘅西裝會好冧,好似攬住個靚女一樣有肌膚之親。」

採訪:方騫平 服裝:tuxee.co 髮型:Sunny Yu@ Hair Culture 化妝:江中平化妝室

hd