PACO名人會——同「阿翁」結緣二十年 向海嵐帶楊思琦「飯堂」取食經

        近日為亞視主持旅遊節目《今晚見》的前港姐冠軍向海嵐(Anne),當年因港姐身份跟富豪酒家老闆阿翁(翁仰光)結緣,自此成為熟客。這日我有份成為座上客,跟阿Anne和她的港姐「師妹」兼好友楊思琦,一同品嚐名廚主理的美饌和暢談食經。阿翁新出的招牌菜式,原來大部份idea都是出自阿翁千金Vivian(翁文敏)。鍾意四圍「食好西」的阿Anne坦言是阿翁粉絲:「我煮嘢唔叻,但食嘢好講究,呢度好多菜式嘅水準都好高,最啱我近年嘅食嘢宗旨『食得精』,留quota食好嘢嘛!」我非常同意,亦是我近年食得健康的方法!

阿翁在96年創立富豪酒家,仲連續8年獲得米芝蓮一星評級,為吸納更多年輕食客,他近年尋求突破,搵來在美國修讀酒店管理的囡囡Vivian提供意見,Vivian說:「因為傳統中菜、鮑參翅肚都畀人娘娘哋嘅感覺,老人家先鍾意食。我就希望可以將中菜年輕化,所以有同爹哋傾,好似一啲菜式、甜品嘅製作,份量嘅多少、擺盤,都想做得後生啲。」因此設計出幾款新派菜,好似陳皮金瓜泥官燕、鮮果沙律金銀斑和脆皮龜苓膏及馬蹄糕等,甚有新鮮感。

O氹囡食譜變招牌菜

  煮盡鮑參翅肚的阿翁,在家原來是一位廿四孝父親,曾經為遷就女兒口味而度出好受歡迎的招牌菜脆皮魚翅雞翼,於雞翼內釀入魚翅,後者吸收雞肉肉汁,外脆內juicy,成功O氹囡。Vivian說:「爹哋煮嘢好好食,但想食佢嘅手勢,就一定要去舖頭,喺屋企全部由媽咪出手。我鍾意食爹哋嘅脆皮魚翅雞翼,喺鮑參翅肚中,魚翅係我比較麻麻哋嘅食材,爹哋就諗咗呢個整法,令我食多咗魚翅。」

品牌年輕化

  有Vivian為父親的經典品牌年輕化,名廚就梗係放心。阿Anne因港姐跟阿翁結緣,仲成為餐廳常客,「98年我成為港姐冠軍,其中一個獎品就係呢度嘅一圍酒席,因為咁我做咗阿翁哥嘅粉絲,呢度好多菜式嘅水準都好高,所以如果我喺香港嘅話,好多時都會嚟食飯㗎。而且早年阿翁哥有贊助過『慧妍雅集』,嗰時一個月喺度開兩次會都特別多會員嚟,因為啲嘢真係好食。」無獨有偶,阿Anne最近都有一些年輕化新搞作,「我同一位珠寶設計師朋友,創立咗一個珠寶品牌,主力以翡翠去出品首飾。我哋揀翡翠嘅原因,係因為佢嘅典雅高貴,可惜佢畀人嘅感覺好古老,所以我就想將呢種原料年輕化,加入新式設計,令人對翡翠有一個新嘅觀感。」

思琦返內地拍新片

  跟好友阿Anne來歎美食的思琦,首見阿翁名廚,就能即場見識老闆炮製好啱女人食的「阿翁炒花膠」,坦言好有口福。思琦說:「我最鍾意食,唔會因為怕肥而戒口,最多之後做多啲運動。平日盡量食到7、8成飽,會健康啲。」講到工作,不時要返內地商演的思琦,下月將會去茂名逗留三星期,拍內地電影《田園時代》,新片圍繞三個不同年代的女性,致力將鄉村現代化,她飾演80年代的外來媳婦,思琦開心說:「第一次演啲鄉村、好純樸嘅角色,劇本好勵志,而且今次全程都要講普通話,所以O依家好努力睇劇本。」問到要同6歲囡囡卓穎分隔兩地,思琦都有不捨謂:「唯有日日facetime啦!所以我都想接多啲香港嘅戲,多啲留守香港陪吓囡囡。早排復活節陪完佢(囡囡)上郵輪玩,佢都有叫我抽多啲時間陪佢再去旅行。平時有啲慈善job,我都會帶囡囡一齊去,用身教教育佢去幫人。」

主持 : 黃柏高

統籌 : 林永匡

攝影 : 袁東亮、謝民光

協力 : 林書鉉

場地 : 富豪酒家

(電話:27362228)

黃柏高




hd