PACO名人會——友情班底 炮製2月紅館個唱 鄭伊健:同入場Fans開party

        踏入2019年,我好期待的型男鄭伊健將於下個月尾再次踏上舞台開Show。對上一次伊健個唱已是2012年的事,等足7年,今次紅館演唱會名為《Along with Ekin Live Concert 2019》,伊健開心話:「我有7年冇喺紅館開過個人演唱會,中間當然有同其他『古惑仔』開show,但係感覺始終係唔同嘅。我有好多粉絲係支持咗我好多年,今次我想同所有入場嘅人開party。」開足6場,我一定去捧場!

        下月第5次開個唱的伊健好念舊情,自98年個唱遇上合拍的製作班底,自此合作無間。今次繼續由陳光榮擔任音樂總監、朱祖兒做創作總監,伊健表現雀躍,「由我第一次喺紅館開演唱會到今次嘅班底,都係同一班人,無咗其中一個我都唔會做,呢個亦係我隔咗咁多年先再開show嘅原因。」尤其是同陳光榮關係密切,缺一不可,兩人合力炮製多首金曲,包括《友情歲月》、《一個為你甘去蹈火海的人》、《一生愛你一個》等,伊健強調:「音樂上我只是演繹,無呢位靈魂人物,咩都做唔到,我哋就好似風雲,我係風,佢係策劃成件事嘅雲,多年不變。」

「風」「雲」合體

  在我眼中,伊健唔單止唱得仲係一位表演者,伊健一踏上舞台就是去entertain大家,似睇一個good show。伊健亦認同:「個唱暫時嘅構思係同電影有關,因為我有好多歌都係電影嘅歌曲,所以會朝住呢個方向去諗,電影感會多啲。」談到排練情況,伊健表示現正努力操練,提升體力,服裝上亦無底線,坦言「設計乜就着乜」。伊健平日亦愛親親大自然,他分享說:「除咗喺健身室操體能,我最鍾意行山,睇吓大自然環境,曬吓太陽。呢個習慣我維持咗幾年,最開心係見到呢幾年行山嘅人多咗。香港人壓力太大,應該接近吓大自然,呼吸吓新鮮空氣,咁樣心情都會舒暢啲。」

神秘兄弟

  嘉賓方面,伊健多年來有一班古惑仔好友陳小春、謝天華、林曉峰和錢嘉樂,去年搖身一變成「黃金兄弟」,個唱上應該唔少得五子合體!伊健說:「佢哋(古惑仔)已經好興奮,不過除咗佢哋,我都構思緊請啲咩嘉賓,既配合到我嘅主題,又畀到驚喜觀眾。」唔知近日幫手宣傳的「細細粒」黎姿,會否驚喜上台呢?

老婆靚湯

  今次開Show,伊健在飲食上並無特別調節,皆因平日不會暴飲暴食,反而喜歡試不同菜式,伊健說:「我係鍾意歎fusion菜,而tasting menu都好鍾意,一道道菜配唔同嘅酒,真係會提升到菜式嘅層次。」廚藝方面亦好有創意,他笑謂:「我試過學日本節目,打開個雪櫃,見到有咩材料,就用嗰啲材料去煮嘢食,出嚟嘅效果都OK㗎。哈哈!」至於冬日滋補,伊健就唔少得近年鍾意鑽研愛心湯水的鄭太(蒙嘉慧)出品。「唔係老火湯,其實唔好成日飲,因為補得太多都傷身。我最近經常飲嘅係蘋果栗子腰果湯,就算唔落肉都好甜好滋潤,有時食湯渣都食飽。」



主持:黃柏高 統籌:林永匡 協力:袁東亮、林書鉉 攝影:謝民光 場地:唐人館 (電話 : 2157 3148)

黃柏高

hd