PACO名人會——首次執導拍賀歲片 林敏驄希望觀眾 笑完再感動

  由鬼才林敏驄首次自編自導自演的賀歲片《如珠如寶》搵了「福星」洪金寶和吳耀漢再合作,加上有林雪、林盛斌(Bob)和張繼聰一齊演出,阿驄坦言是將老中青的搞笑高手放在一起,令電影變得更精采,並希望大家笑完之後再感動,對身邊的老人家「如珠如寶」咁愛錫。

電影講述林敏驄飾演的阮祥昌是從戰場回流的無分國界醫生(阿驄為免跟無國界醫生一樣),在街上撿回老人洪金寶、吳耀漢、梁小龍、泰迪羅賓和恬妞,並安置在祖傳的老人院中安享晚年。集團創辦人林雪因往事對阿驄懷恨在心,誓要奪取老人院,並派出職員張繼聰及林盛斌混入搗亂,好彩眾老人家均身懷絕技,誓要保住老人院。

洪金寶回歸

  林敏驄表示這套是笑中帶感人的正氣電影:「搞笑係瘋狂嘅,因為係賀歲片,笑係好正路,但如果笑中有啲意思,會令人睇到好感動係bonus,點知我哋唔覺意中晒,哈哈!」今次他自編自導自演,亦邀請了大哥大洪金寶出山:「你知佢幾耐冇演純本地製作嘅香港電影啦,有佢又有埋吳耀漢,有番當年福星片嘅cast,仲有泰迪羅賓同恬忸姐,而小龍哥你睇佢打就走唔甩,加上有林雪、阿Bob、王菀之、張繼聰同『波波姐』莊端兒。老中青好多代嘅喜劇演員喺晒度,個個有自己嗰套獨門武功,擺埋一齊又唔會搞亂件事,非常之好。」

  談到電影最感動的一場,阿驄直言跟張繼聰及吳耀漢有關,「老人家想安享晚年,但佢(張繼聰)嚟搞搞震,結果佢同Richard(吳耀漢)產生感情,因為Richard個仔又係走咗,之後Richard要走喇,畫面好touching。」張繼聰補充:「我仲扮佢個仔了結佢個心願。」談到今次與吳耀漢的合作,張繼聰續說:「Uncle Richard好認真,有場戲佢入晒戲老淚縱橫,跟住我好放心,只要跟住前輩行唔好走失就得喇。」他亦大讚林敏驄做導演不獨裁:「佢會堅持佢想要啲乜嘢,但會畀空間你,我同阿Bob想啲位得意啲,度完後欠一兩句絕核台詞,佢又發揮度佢嘅功效。」

浸到皺晒皮

  此片的女角除了有恬妞和王菀之外,莊端兒在戲中飾演一位明星,更有場穿比堅尼浸浴缸的戲份,她稱拍足一晚浸了7個小時,浸到皮都皺晒,幸好有導演的悉心照顧:「佢對我特別細心,拍呢場戲時不斷有人加暖水畀我,其實佢哋都想我浸耐啲,因為拍嗰場戲時,係最多人喺側邊睇嘅。」雖然過程辛苦,但她笑言:「同班老人家一齊做對手戲都開心嘅。」

主持:黃柏高 統籌:林永匡 協力:李佩儀

攝影:李維隆、謝民光 場地:佳牛美酒

黃柏高

hd