PACO名人會——首次聲演動畫攰過拍戲 劉浩龍吳千語 搵啱聲線唔容易

        由張彥博、吳千語、劉浩龍(師兄)和栢天男聲演的動畫《女皇哥基大冒險》將於復活節上映。眾人同樣是首次為動畫配音,無諗過較拍戲更攰,加上要搵啱配合角色的聲線需時,又要長時間keep住把聲去講對白並非易事。但對於這個人生第一次,四人均覺得是一個非常好的經驗。

此片講述英國皇室最得寵的哥基Rex,生活在白金漢宮。由於最得英女皇歡心,他的態度不可一世。在一次美國總統到訪白金漢宮期間,Rex引發一場不可收拾的外交風波,一夜之間成為流浪狗。

好考功夫

  TVB藝人兼歌手張彥博聲演主角Rex,他坦言首次聲演是個很好的經歷,「其實我喺入面仲要唱歌,但聲演同唱歌好唔同,不過共通點都係丹田要用力,一路要keep住把聲有energy,記得開頭我要用45分鐘時間去搵啱把聲,又要穿越晒咁多場,做好多狗嘅反應聲,仲第一次扮撞擊聲,錄咗3日之後謝晒,而最困難係原裝版本講英文,我講廣東話時要追住佢哋嘴形去講,真係好考功夫。」

變得奸險

  Rex由萬千寵愛變成流浪狗全因另一小狗Charlie,聲演Charlie的師兄笑言:「Charlie本來係女皇最錫嗰隻狗,點知Rex嘅出現,令我被貶落第二,搞到好失落,所以要諗計仔趕走佢。」師兄續稱恨做配音恨咗好耐,今次做到都幾開心,他坦言搵啱把聲都用咗45分鐘,並搞笑說:「最辛苦係長時間錄對白坐到pat pat都扁埋,因為張櫈好硬,結果我用咗三個墊去紓緩。」

艷壓四方

  吳千語在動畫中聲演靚靚狗Wanda,「一出場我唱住歌、跳住舞,喺寵物收容所裏面艷壓四方。一開始我係大哥嘅女朋友,但大哥蝦蝦霸霸,好臭脾氣,對我又唔好,直至遇到Rex,發現佢好有正能量、好正義,慢慢就鍾意咗佢,飛咗個大哥。」導演一開始要她表現姣一點,於是她試用高音和低音,並坦言:「初頭我都未搵到啱用嘅聲,後尾我先發覺原來我有另一把聲可以用。」大家拭目以待!

準備十足

  在動畫中聲演狗仔Nelson的栢天男,由於他來自澳洲不太懂中文,所以要用廣東話講對白都困難,「因為唔可以用身體語言,全部都要用把聲,好在導演之前畀咗對白我練。」問他是否要well-prepared?他直言:「可以話係over-prepared多啲,我諗住演狗嘅角色,有機會會吠,我唔知哥基點吠,所以我睇YouTube學咗半日。」他續稱今次講得多對白會聲沙,並學識食糖潤喉,錄到尾聲時更懂得控制把聲。

髮型、化妝及服裝:Deep Yu@Beijing Hair Culture(張彥博)、Jo Lam@Salon Trinity、Zoefan、Maje(吳千語)、Zenki Lau@La Mod Salon、Rainbow Chung@Annie G Chan、Ted Baker (栢天男)

主持:黃柏高

統籌:林永匡

協力:李佩儀

攝影:袁東亮、謝民光

場地:養心殿台式養生鍋

hd