PACO名人會——如個人音樂回顧展 蘇永康首個中樂伴奏演唱會

        蘇永康(阿公)將於6月21日及22日假紅館舉行「All That Jazz (&Pop)」個人演唱會。一向熱愛西樂的他,今次會搞搞新意思與中樂團合作,他稱原來中西合璧可予人好fresh的感覺,所以他非常期待,並稱個唱rundown會由1989年初出道的歌唱到近期的新作,像是他的音樂回顧展,希望大家洗耳恭聽。主持:黃柏高

統籌:林永匡

協力:李佩儀

攝影:袁東亮、謝民光

場地:FINDS

        阿公對上一次開演唱會是八年前,他透露公司一直游說他開Show,但他是個愛創新的人,當未想到有甚麼新元素可以加入時,他堅決拒絕。直至前年應邀參與澳門回歸騷,初嚐與中樂團合作,他坦言:「咁多年我都冇乜將中樂放喺歌入面,管弦樂同爵士樂就試過好多次,點知到綵排時嗰個震撼感大到呢!佢哋可以將《有人喜歡藍》同《晚風》結合,好犀利!」當時他做完後「嗒晒糖」,於是公司順勢問他入唔入紙申請紅館開個唱,他即回應說:「好吖!」他回憶去年初入紙,到今年就成事了。

齋唱唔跳舞

  原本他想邀請番澳門中樂團合作,但他們的schedule太緊密要排隊,幸好他之後邀請到廣州中樂團去做,他形容:「86人嘅樂隊再加4個music section即Joey Tang佢哋,仲有兩個和音加埋我,成93人喺個台上面,陣容都幾龐大,所以曾經有人問我會唔會跳舞?我話唔好喇,咁多人喺後面點跳,加上從來冇人嚟睇蘇永康跳舞,大家帶隻耳仔嚟聽吓歌好過。」而演唱會的rundown,他會由入行的第一首歌唱到近期的新歌《All That Jazz》,他續說:「都幾係蘇永康嘅一個音樂回顧展,係呈現我另一個音樂里程。」

新歌講囝囝

  提到新歌《All That Jazz》,阿公說:「咁多年我都希望同唔同嘅作曲人合作,今次嘗試啲唔係咁主流嘅,就搵咗高世章幫手,第一次接觸佢係拍《如果愛》嗰時,跟住喺好多電影睇到佢嘅配樂,做得非常出色。」有晚阿公約對方出嚟傾,他一坐低,阿公就問:「Jazz同拉丁音樂係咪一樣嘢嚟?佢話係,咁我話我想做拉丁節奏嘅歌,再喺音樂上加二胡同古箏,將幾種唔同嘅元素擺埋一齊,呢種曲式喺廣東音樂上較少。」而主題是All That Jazz,他續稱《All That Jazz》是一套80年代初著名的電影,他再搵久未合作的填詞人CY Kong幫手,他說:「首歌套咗落我個仔度,因為我個仔叫Jazz,想講我同個仔嘅相處。」大家可在歌曲中細味他的父子情。

黃柏高

hd