PACO名人會——拍《九龍不敗》嚇親 劉心悠 鄧麗欣讚張晉人品好又搞笑

  在陳果執導、張晉主演的武打動作新片《九龍不敗》中,劉心悠和鄧麗欣(Stephy)分別飾演富二代中醫師和張晉的女警女朋友。她們均稱最初以為「打得之人」張晉非常Cool,原來好Nice,又識照顧人,仲好幽默。Stephy話今次睇唔到張晉拍打戲有點可惜,而她在片中不用打,動作鏡頭就是穿婚紗跑步,另有場血腥戲令她好心寒。而劉心悠覺得最難是開快車,因怕刮花名車搞到壓力好大。

拍開藝術電影的導演陳果,難得挑戰武打動作片,有份兼任編劇的他,今次創作純以人物行先,由主角「九龍」的紋身開始講故事,片中更有連場逼真的打鬥場面。

張晉心病因Stephy

  劉心悠在戲中飾演富二代中醫師,張晉是他的病人,她說:「因為佢有啲嘢擺唔低,所以我用針灸幫佢醫治。期間覺得佢個人幾信得過,所以唔介意幫佢搞掂晒啲麻煩嘢,因為我有錢嘛。」而Stephy接着說:「點解佢(張晉)會有心理問題,就係因為我,我演女警,又係佢女朋友,有次遇到變態殺人狂,佢專殺女警,唔好彩我係遇害嘅一個,張晉本身已經查緊呢單案,未婚妻遇害後佢更加失控,所以就要搵心悠。」

晉哥哥原來好幽默

  心悠及Stephy均是跟張晉第一次合作,拍攝前她們心想:「佢咁cool會唔會令人有啲驚、唔敢同佢傾偈呢?」接觸過才發現是相反的,她們不約而同覺得張晉好親切,心悠仲大讚:「晉哥哥其實好幽默,佢成日講啲Gag我係諗幾秒先知佢原來講緊笑。」Stephy續說:「佢仲好識照顧人,同佢傾完偈一啲都唔覺得佢Cool,可惜今次冇機會喺現場睇到佢拍打戲。」

心悠難忘撞花名車

  雖然電影屬武打動作片種,但Stephy完全不用打。她笑言:「片中最大嘅動作就係着住婚紗跑步。」講到遇害情況,Stephy坦言幾恐怖,「我喺車入面追緊個兇徒,個畫面都幾血腥,所以拍嘅時候都幾驚。」心悠為演好中醫師一角,拍攝前特別去請教中醫師,她說:「因為把脈係好專門嘅學問,另外我覺得最難係揸快車,因為嗰架係Porsche,導演叫我放馬去,但我驚刮花架車,所以心理壓力都好大。結果我真係刮花咗,跟住我見到導演摸住花咗嗰個位,嗰場戲都好難忘。」

主持:黃柏高 統籌:林永匡 協力:李佩儀 攝影:袁東亮、謝民光 場地:喜之次

黃柏高

hd