PACO名人會——天佑《尋常心》大膽演HeHe 梁祖堯感激秋生助陣 成夢幻組合

  舞台劇百花齊放,近年吸引唔少影帝影后級人馬踏上舞台親親戲迷。最近「風車草劇團」將美國得獎舞台劇《尋常心》(Normal Heart)帶到香港,仲吸引到三屆金像影帝黃秋生,及演技大躍進的徐天佑演出,加上劇團核心人物梁祖堯、湯駿業(阿Dee)同邵美君,組成夢幻組合。祖堯表示劇中其胞兄一角,仿如為秋生度身訂造,感激對方助陣,成就8月中公映、令人期待的神劇。

集夢幻組合演出的神劇《尋常心》,由著名編劇Larry Kramer撰寫,故事講述美國80年代時愛滋病爆發,可惜當時世人對它認識不深,只知道染病的多是男同志。主角Ned(祖堯飾)眼見朋友相繼死去,便找任職律師的哥哥Ben(黃秋生飾)、銀行家好友Bruce(湯駿業飾)成立組織,為病人爭取權益,卻受盡社會各界多番阻撓,就連哥哥最後亦抽身而退。原著舞台劇近年重演,在11年獲得美國劇場界最高榮譽「東尼獎」的最佳重演劇作,2014年改編成HBO電視劇。神劇得以港化,全因阿祖、阿Dee同阿君。

  兼任監製的阿Dee話:「《尋常心》係一個很好演嘅劇目,因背景複雜夾雜好多衝突,角色又過癮。」祖堯補充說:「當我哋決定要演呢個劇,就想搵重量級卡士,第一時間已鎖定大師兄(秋生為演藝學院第一屆畢業生)和天佑嚟做,我和大師兄12年合作過舞台劇有啲交情,於是有晚10點我膽粗粗訊息佢,話有個劇想搵佢一齊演,秋生就回覆『打畀我』,我戰戰兢兢call佢,講咗兩句連劇本同價錢都未傾,佢隔咗唔夠15分鐘就覆我,應承演出嘞!我真心好感激佢肯做。」

秋生一早背熟劇本

  秋生聞言搞笑說:「嗰晚佢十點call我,我都差唔多飲醉,乜都話好啦!哈哈!不過你哋係名牌(風車草劇團)嘛!我出嚟學嘢啫,好hea㗎,對白又唔係好記得。」祖堯即踢爆影帝秋生是「高手」說:「第一次圍讀時,佢背熟晒對白㗎!所有位都記住晒!勤力到驚呀!」天佑今次飾演祖堯的一夜情舊情人,再次飾演同志角色,他說全因劇本好好,好有興趣挑戰吓:「上次係喜劇,今次嚴肅好多,而且電影可以NG,舞台劇就唔可以,加上4位對手都係紅褲子出身,我覺得我唔可以拖累佢哋。我特別搵咗老師幫我排練,每一個細節都同我執,我希望可以追得上佢哋嘅步伐。」

天佑惡補演技

  唯一女將阿君,跟阿Dee、祖堯創立劇團,三人同為演藝學院校友,並肩作戰多年,已建立一定默契。「我同祖堯演過好多唔同嘅劇目,第一次合作係讀書時演《綠野仙蹤》,今次演嶄新劇目,又請到大師兄同我哋演,十分期待。」祖堯說:「係呀!正式綵排喺7月,要就返導演喺英國返嚟,佢係我哋以前演藝嘅老師Alex Taylor,熟知我們嘅能力,所以效果一定不會差。屆時密集式排6至8星期,成班人一條船,培養晒感情同默契,會有更多火花。」

主持:黃柏高        統籌:林永匡

協力:袁東亮、林書鉉        攝影:謝民光

場地 : 麵鮮醬油房周月

(電話:23367888)

黃柏高


hd