PACO名人會——Busking靚聲王 唱而優則演 黃進林感激范振鋒提攜

  由范振鋒親自發掘、又是太太李思欣師弟的新晉歌手黃進林(Michael),畢業於香港演藝學院Excel音樂劇課程。除演出舞台劇外,Michael亦熱愛唱歌,3年前開始在街頭busking,以音樂會友,其中一次開live,偶然被阿范看到,阿范即偷偷到現場看他表演,加上老婆跟Michael是同校兼跟同一個歌唱老師,曾向阿范推薦,阿范便決定簽他做歌手,23歲的Michael決定用5年時間闖一闖,他希望歌曲能帶給大家正能量,fans聽完後會開開心心。

主持:黃柏高 統籌:林永匡 協力:李佩儀 攝影:袁東亮、謝民光 場地:鮨秀

  多才多能的Michael三年前開始街頭busking,不時游走銅鑼灣、尖沙咀等街頭自彈自唱,他說:「我一路都好鍾意唱歌,曾經參加過比賽,但名次唔高,所以我索性用自己嘅方法令更加多人聽到我唱歌,我就揀咗busking。」不過在街頭busking冇錢收、又要畀人趕,他心酸地說:「仲因為有唔同單位喺度,試過互相騷擾。」現時能成為歌手,他興奮話好好彩遇到阿范。

李思欣師弟

  阿范直言是上網睇中Micahel,「因為佢busking之餘仲會開live,睇到佢啲片,我覺得呢個後生仔都OK喎,再去現場睇咗佢幾次,佢唔知嘅,又check吓佢啲資料,原來佢都有做過舞台劇,最有緣係思欣原來係佢師姐嚟。」思欣續說:「因為大家都係讀演藝學院,咁啱我同佢又係跟戴辛尉老師學唱歌,好有淵源。」她因為Michael又乖又有禮貌,仲咁醉心唱歌,便介紹給丈夫。阿范笑言:「好神奇,佢成日講戴辛尉老師有個學生幾好,想介紹畀我哋公司,原來係同一個人。」

親身經歷作藍本

  最近Michael終於推出他第一首新歌《分開紀念日》,由舒文監製、黃思彥作曲及林若寧填詞,製作班底強勁。Michael說:「當日舒文監製首歌時搵咗我一齊度呢個古仔,佢話不如你搵一段刻骨銘心嘅戀情去作一個藍本,我覺得好好彩,可以用自己少少嘅經歷去做第一首歌。」嚟緊會錄第二首新歌,他稱都是比較溫柔的慢歌。對於Michael的表現,阿范表示:「作為新人算幾好,當然仲可以有好多進步空間。」思欣就大讚首歌好聽易上口,鼓勵他要繼續努力。

香港樂壇不死

  雖然香港樂壇不及以前蓬勃,有人更認為廣東歌已死,但DJ出身的阿范唔同意:「其實廣東歌真係好好聽,尤其係舊歌更加好,所以我覺得廣東歌係唔會死,既然有公司support,盡量喺有限嘅成本搵啲識音樂嘅人好似Michael咁,識彈又識唱,希望喺樣樣冇咁貴嘅情況下繼續維持。」思欣坦言自己不熟悉音樂,阿范取笑她學唱歌只是為登台,從無想過出碟,皆因她一直心繫演戲方面,她說:「好似我睇完套戲會去咀嚼個內容,有時阿范攞劇本畀我睇,我會分析邊樣嘢好、邊樣嘢唔好,可以擺啲咩元素落去,最鍾意就係演內心戲、表達到message。」阿范即自爆:「有時我畀啲劇本佢睇,有啲已經拍咗,有啲要開拍,有時佢話唔得嗰啲真係唔得,好準確,搞到我都有啲驚!」

黃柏高


hd