PACO名人會——首與導盲犬拍戲 羅仲謙接受特訓搏到盡

         日本片《導盲犬小Q》15年前曾令觀眾喊完又喊,今年導演羅永昌與一班愛狗演員包括任達華、梁詠琪(Gigi)和楊采妮(Charlie)等拍成新版《小Q》,故事講述導盲犬一生,羅導表示導盲犬經訓練後,真的可以保護視障或失明人士。在電影中分別飾演導盲犬訓練員和寄養家庭少女的羅仲謙及袁澧林(Angela),均是首次與動物拍戲。羅仲謙為求迫真,事前花心機時間接受特訓非常搏;而Angela則與狗拍檔多相處以聯繫感情,令拍攝更順利。主持:黃柏高 統籌:林永匡 協力:李佩儀

攝影:袁東亮、謝民光 場地:Yakiniku More

        新片講述導盲犬小Q與後天失明的甜品名廚李寶庭(任達華飾)和其妹妹李寶兒(梁詠琪飾)的友愛互動,牠的忠誠更令迷惘暴躁的寶庭解開心結,促使他勇敢展開新生活。而訓練員(羅仲謙飾)和寄養家庭(楊采妮、郭晉安、林文龍、袁澧林、劉楚恬飾)的情節,更令故事增添色彩。

導盲犬護主有功

羅導演本身也有養狗,當決定拍「導盲犬」題材時,他做了很多資料搜隻,才理解導盲犬的厲害,「佢哋受過訓練,見到嘢食唔會衝;去到每個路口有石壆會停得好準;帶你上樓梯,每逢上完第一級佢會停低,令你知道要上樓梯;而最緊要係,腰以上所有嘢如前方有橫樑,佢一定帶你避開兜第二度行,(佢過馬路識睇車嗎?)佢真係識,所以佢真係保護到視障或失明人士嘅安全。」由於拍動物戲有一定難度,所以今次要用9隻狗合演,拍牠們每個鏡頭又要有耐性,但羅導笑言「拍吓拍吓又過到」。

返工學做訓練員

羅仲謙和Angela今次首度與動物合作拍戲,羅仲謙笑言:「其實我入行十幾年係第一次同狗仔拍戲,為咗個角色,我去咗導盲犬協會受訓、學做一個導盲犬訓練員。」他表示花了很多心機、時間跟在職訓練員返工,他說:「一個禮拜大約返3、4日,每次3至4個鐘,果然出嚟嘅效果好自然,我都好滿意,有幾次仲畀導演讚,我自己都好開心。」他希望盡量做好自己本份,令導演的壓力減到最低,他解釋:「我有時知道導演都頭痕,因為唔係話你想嘅嘢,動物喺現場即刻做到,導演叻在識執生,有時唔係設計嘅嘢反而效果更好。」

「非常」拍攝方法

Angela與狗仔拍完戲,才發現跟動物拍戲都要用「非常」方法,她笑言:「譬如我哋要拍同狗仔嘅互動,可能要佢衝上嚟張牀叫我起身,我哋會用好多方法做到呢個效果,例如唧啲透明嘅芝士醬喺條頸度,等佢可以熱情啲。同埋現場有拍文戲同動作戲嘅狗,我哋每次都會試唔同嘅狗仔,睇吓邊隻接收嘅指令同你做嗰段戲最似,我覺得成個過程都幾得意。」羅導大讚今次所有演員都是愛狗之人,就算拍得耐都毫無怨言,令他很安慰。問羅導今次要觀眾喊幾多次時,他反而希望觀眾能自然流露,並透露結局是陽光又正面,怕喊的觀眾也可以放心入場睇。

黃柏高

hd