營爆生活——坐月飲食

    未做媽媽前,天真地以為坐月好輕鬆。尤記得當年還想過可以拋低寶寶去旅行,又或者報名大學課程去上幾天課。真正經歷過就知道,坐月時每天連睡眠都不足,甚至連自己飲食也無閒料理,所以有陪月或家人照顧媽媽日常飲食,真的幫了一個大忙。

  無論順產定開刀,媽媽於生產早期都有傷口,飲食中必須有充足蛋白質,去促進傷口瘉合。含有豐富蛋白質的食物包括肉類、魚類、海鮮、蛋、豆腐、牛奶等,建議每天進食六七両;另外攝取足夠維他命C,有助身體製造骨膠原,亦對傷口復原有幫助。維他命C豐富的食物包括橙、奇異果、木瓜、士多啤梨、燈籠椒、番茄、西蘭花等。烹煮一些家常小菜如番茄煮牛肉、鯪魚肉煎釀三色椒、西蘭花炒雞柳等,再配合每天吃兩個水果,已能達標。

  很多媽媽會餵哺母乳,全埋身媽媽每兩小時餵一次,一天八至十二次,或者泵媽每四小時泵一次奶,之後又要清洗奶樽、餵奶、掃風、換片等無間斷輪迴,都註定人奶媽媽無覺好瞓。此時家人不妨化身神隊友,定時送上一杯暖飲如溫水、炒米茶或一碗湯水等,補充身體所需去製造乳汁的水份,每日應飲超過八至十杯。另外,留意攝取足夠鈣質,所以每日應進食兩份奶類製品如牛奶、芝士、乳酪等。

  坐月絕對是一生人最甜蜜但又最繁忙的時候,媽媽如同變身超人,多疲累都得撐下去,各位新手媽媽繼續加油啊!



黃思敏


hd