頭條影評——《尋找快樂的盲點》笑住吸收正能量

 上天偶然都會好公平,你視力弱咩?聽力及記憶力一定異於常人,如電影中的男主角Saliya。後生仔突然視網膜脫落,視力僅剩5%,大部份人會叫晒救命,生不如死,呻到無晒朋友,但佢唔怯繼續追夢,不惜隱瞞眼疾,誓死考入全德國最豪華酒店做學徒。眼盲心唔盲嘅佢憑住超強聽力、記憶力及好友協助,通過考試實現心願兼覓得索囡囡,幾十噸正能量。

  電影改篇自真人真事,一個近乎盲嘅人可以喺廚房工作可以執房可以喺人來人往嘅酒店暢通無阻,甚至可靠聽力就聽得出酒杯乾唔乾淨,好誇張但確實發生過。其實Saliya真身扮視力正常扮足15年先被識穿,較電影更匪夷所思。

  電影純Sell勵志,正能量之餘幾好笑幾得意幾輕鬆,壓力超大嘅香港人好啱睇,有啲似城城嘅男主角Kostja Ullmann有演技唔作狀仲要好靚仔,睇佢一股熱血衝衝撞撞,盲但不知幾精靈,加咗好多分。(思慧)

hd