頭條戲場—— 《單身動物園》史上最惡毒愛情片

        喺未來的社會中,單身是有罪的,單身男女將被送去酒店,45日內要在酒店中搵到跟自己匹配嘅另一半才可重生,否則你將會變成一種動物,流放於森林。何謂匹配?同星座及血型唔算,理念一致都唔係,要有共同特徵及九成九似的性格,試舉例說明之,你會無啦啦流鼻血,另一半都係,這叫完美;又或你好冷漠無情,另一半同樣,咁叫襯到絕。好變態,但愈睇愈過癮,因為電影大巴大巴摑醒虛偽愛情豬豬,扮相愛比扮不愛難億倍,但人類總愛自己呃自己。

        男主角David(Colin Farrell飾) 被老婆拋棄而送入配對酒店,成身肉又唔靚仔的David已打定輸數,所以一早諗定要變成龍蝦,因為龍蝦既長壽,而且性能力唔會因衰老而退化。但眼見院友跛腳男(Ben Whishaw飾)扮流鼻血而跟鼻血女(Jessica Barden飾)配對成功,David有樣學樣,努力搭上冷漠女(Angeliki Papoulia飾)以為可逃離酒店,但扮相愛早晚被發現,之後死得更慘。

真情是禁不到的

  突然進取的David選擇逃亡到單身者森林,反戀愛的單身者組成叛軍,由首領 (Léa Seydoux飾)話事,加入叛軍就要嚴守禁拍拖規條,被發現又會死得好慘,但世事就是如此,David跟同樣配對失敗嘅逃亡近視女(Rachel Weisz飾),兩個人內到外都好夾,但奈何。電影設定的世界觀好有趣,戲中所有人的人性都被扭曲,你是變態或是偽裝者之王才能生存。電影是一套充滿揶揄的黑色寓言故事。(剛上映)

撰文︰廖思慧

hd