首先要讚香港譯名，《訪．嚇》完全表達到成套戲嘅中心思想，再讚同時兼任編劇、監製及導演的Jordan Peele，呢位擅長配音及模仿的諧星一鳴驚人，首拍懸疑驚慄電影竟然可以有如此成績，拍攝成本僅450萬美元（約3500萬港元），累積票房已超過12億港元，用刀仔鋸出一個森林，好黐線。喪收原因係電影無刻意賣弄爆血四濺嘅刺激官能場面，又唔會同你玩失驚無神恭喜你，只通過故事、配樂及對白等去烘托電影嘅恐怖氣氛，聰明又高招，愈睇愈心寒，達驚悚片最高境界，全場坐立不安，無半點吹水。點名特讚黑人女管家，嗰幕有口難言NONONO，完美演繹何謂啞子吃黃蓮，演技超出色。驚慄片迷必必必入場。（5月18日驚驚上映）
一位非裔美國出名攝影師兼藝術家Chris Washington（ Daniel Kaluuya飾）同白人女友Rose（Allison Williams飾）相戀五個月，後者相約前者在周末回鄉探望父母。Chris一到埗就覺得唔多妥，首先發現女友家兩位黑人男女管家相當古靈精怪，再發現其父母過份熱情加上開懷念老人家Party時一眾白人的刻意討好，句句話中有話，你會覺得想點呢？最令Chris不安嘅係一班白人口講無種族歧視，但行為加語言完全暴露晒心中所想，Chris忍唔住同挑通眼眉的老友申訴，愈講愈恐怖。
涉及種族問題
開始寫劇本時，導演首先構思出一個同時包含咗驚慄元素及社會實況嘅故事提綱，最後電影集幽默、諷刺和驚慄於一身，驚中帶笑，笑完再繼續令你不安，導演最勇就係無懼涉及到美國當前極具爭議性嘅種族問題，他說：「我希望喺驚慄恐怖片種中加入我嘅聲音，涉及到種族問題及一啲我熟悉嘅範疇，即是喜劇。電影正好反映到我最真實嘅恐懼，同埋一啲我曾遇過嘅問題。」
飾演女管家的Georgina（Betty Gabriel飾）是全片焦點，佢好恐怖，每一個動作每一句說話你都會驚，但愈睇愈Feel到，原來佢相當可憐，一邊皮笑肉不笑地訴說NONONONONONONONO，一邊流眼淚，佢內心深處嘅自己好想出聲但無能為力，深深感受到黑人女人的強烈自主意識，原來案中有案。
女管家勁好戲
影片最出色的是導演運用大量神秘鋪墊，由開場一刻觀眾就要打醒十二分精神，散場後你會發覺導演心思好細密，一切早有鋪排。
頂級推薦入場
配樂亦非常厲害，開場那幕老笠黑人，汽車一邊慢速行駛，黑人一邊不安快行，背景音樂就是1939年英國老歌《Run Rabbit Run》，歌詞意思係講兔仔如果唔跑快啲，就會俾農夫捉去做兔肉批，音樂輕快但歌詞恐怖仲好配合劇情，導演喺電影頭三分鐘已經開宗明義。看後感︰手提電話要長期有電，有人叫你Get Out唔該快閃。
撰文︰廖思慧
;){kind=link}
;){kind=link}
;){kind=link}
;){kind=link}
;){kind=link}
;){kind=link}