頭條戲場——《異形:聖約》人類都是抵死的

        《異形:聖約》是《普羅米修斯》的續集,兩者相距十年,亦是《異形》系列前傳三部曲的第二章,函接1979年首部《異形》。若然唔記得晒《異形》劇情其實無太大影響,但睇多次《普羅米修斯》先入場是必須的。對於《異形:聖約》,觀眾反應好兩極,一係極讚,一係喪插,係嘅,只出鏡一分鐘嘅James Franco的確好陰功,另一班蠢到癲嘅「聖約號」員工真係好抵鬧,登陸一個新地方, 氧氣罩都唔戴,行為鹵莽又唔聽人講,出事都係抵死嘅。(上映中)

        2104年,「聖約號」載着2,000多名進入冬眠狀態的殖民者、過千人類胚胎、15名員工以及機械人Walter(Michael Fassbender飾),打算用7年時間向殖民星球奧域加-6進發。因為在航程中遇上意外,航行艦損毀嚴重,船長Jacob(James Franco 飾)慘死。一班員工含淚維修時探測到異常雜訊,發現附近有更適合人類居住嘅神秘星球,由二副變船長的Christopher Oram(Billy Crudup飾)決定降落該星球作考察,就算Jacob老婆Daniels(Katherine Waterston飾)多次提醒,軟硬招都用齊,笨Oram仍一意孤行。男人最忌懶醒、唔聽人講、大男人同埋太易信人,好難得,佢中晒。

有啲位好嘔心

  講真,劇情好多位都估得到,所謂嘅神秘星球就是異形棲身之地,一個人中招好快傳畀其他員工,異形不停寄生在人類身上,今次胸爆,下次背脊爆,再下次嘴爆,一貫血淋淋同緊張,但導演Ridley Scott點會得咁少嘢,《普羅米修斯》講人類起源,今集就話你知異形究竟點樣嚟?上集的機械人David是重要人物,無錯,仍然由Michael Fassbender飾演,一人分飾兩角,一個攻心計,一個好忠心,造型完全一樣,但從面部表情或眼神就能判斷誰是David同Walter,勁嘢。

撰文︰廖思慧

hd