頭條戲場——《詭娃安娜貝爾:造孽》好睇過上集一億倍

        2014年嘅《詭娃安娜貝爾》劣評無數,唔驚唔怕唔知想點,但因為人類又要驚又要睇,唔驚又睇吓有幾唔驚嘅心態,票房大收$2570萬美元,有下集是常識。第一集屬《詭屋驚凶實錄》前傳,咁今套就屬於前前傳,講Annabelle由來,今次由《切勿關燈》導演David F. Sandberg執導,由《詭屋》系列製作人Peter Safran及James Wan監製,「爛番茄」評價好高,Annabelle乾坤一開,爭番一口氣。(剛上映)撰文︰廖思慧

        因為第一集太差,今集帶住零期望入場,唔好太伏有啲驚有啲新意就心滿意足,估唔到一開場已經有啲嘢,可以睇清楚Annabelle嘅製作過程,然後好快入正題,隱約記得開場20分鐘我已經要掩住口嚟睇。雖然場景又係一間恐怖舊大屋,有間棄置嘅房,又係玩密室困獸鬥,但今集驚嚇位有好多,仲要八成有新意,例如好似無乜嘢嘅稻草人,佢好邪惡又有啲好笑。

贖罪害死人

  劇情講述洋娃娃工匠Samuel Mullins(Anthony LaPaglia飾)同佢老婆Esther Mullins(Miranda Otto飾)有一個得意囡囡Bee Mullins(Samara Lee飾),Bee車禍慘死後,阿媽為同囡囡交感而任由疑似囡囡靈魂喺屋企逗留,點之所謂嘅靈魂其實係惡靈,闖咗大禍嘅工匠夫婦為贖罪而收留因孤兒院關閉而無家可歸的修女及孤兒,然後八卦又大膽嘅孤兒Janice(Talitha Bateman飾)唔覺意同惡靈有Connect而出晒事,跟住Annabelle瘋狂搞搞震,總之人人有份被嚇永不落空。提醒你:散場唔好咁快走,睇到尾。

  觀後感︰壓迫感超強,買爆谷入場應該食唔到,唔使買嘞。

hd