頭條戲場——《廣告牌殺人事件》唔好睇小女人仔

        電影早已榮獲威尼斯影展最佳劇本及多倫多國際電影節觀眾票選大獎,更大熱捧走本屆金球獎(劇情片類別)最佳影片、最佳女主角加最佳男配角及最佳劇本,完全唔意外,應該的。唔好畀戲名影響,以為劇情講殺人呀講查案呀,廣告牌係關鍵證物之類,NO囉。(1月18日火爆上映)

電影由愛爾蘭劇作家兼編劇Martin McDonagh導演執導。故事由住Ebbing鎮嘅女主角Mildred Hayes(Frances McDormand飾)揸車返歸,然後喺入鎮嘅主要通道見到三塊丟空嘅大廣告牌開始。

  Mildred係一位有一仔一女嘅單親媽媽,因為細女被姦殺,警察查咗七個月零進展,嘴角戚戚,好強悍嘅女人仔無奈又好嬲,覺得警察又廢又懶又不知所謂,為迫警察出力做嘢同洩心頭之憤,一口氣租咗三塊廣告牌一年,牌上分別寫咗三句極具爭議性兼嘲諷鎮上最受居民愛戴嘅警長Bill Willoughby (Woody Harrelson飾)嘅字句,廣告一出轟動全鎮,警察同街坊都對女人仔喊打喊殺,覺得佢搞事同唯恐天下不亂,受害者不獲同情仲要被騷擾被恥笑鬧到PK,香港人應該感受好深。

攞獎實至名歸

  女人仔試圖伸張正義卻被全鎮男性歧視,一眾受過教育如牙醫及神父都對佢唔多友善,後者更勸佢唔好多事,一句抱歉就以為可安撫女人仔,公義?可唔可以用嚟打邊爐?新鮮熱辣奪金球獎女主角嘅Frances演繹一位憤憤不平嘅母親完全入晒血,全程強勢唔聽人講,句句粗口F你就F你,但提起已逝女兒即閃出數秒憂傷,睇Frances表演真係人生一大享受。

  導演坦言Mildred係為Frances而寫。「Frances有Mildred需要嘅特質,即來自工人階級同生活喺郊區小鎮嘅氣息。佢演繹好真實,唔會對角色多愁善感,表現到Mildred嘅陰暗面,同時亦巧妙地帶出幽默感。」

  角色環環相扣,全片無半句廢話,雖然115分鐘瀰漫仇恨,但你又唔會睇到好𤷪𤺧。Frances同奪金球獎最佳男配角,飾演自大、衝動又麻煩嘅警察Dixon(Sam Rockwell飾)交手如頂級拳手對決,群戲亦非常出色,角色無好壞之分,今日係受害者,聽日變咗加害者。劇本好勁,女主角演技好喪,睇到又滾又嬲又笑又喊呀呀呀呀。

撰文︰廖思慧

hd