頭條戲場——《格雷的五十道色戒3》見證安娜玉女變慾女

        雖然《格雷的五十道色戒》一及二集評價麻麻,第一集甚至橫掃金草莓所有大獎,第二集亦同時入圍今屆金草莓最爛電影及男女主角,但你咪理,兩集夾埋全球大收近10億美元票房,第三集大結局自然拍埋落去。睇預告已知,今集純情玉女安娜(Dakota Johnson飾)嫁咗畀霸道總裁格雷(Jamie Dornan飾),兩人由日出錫到日落,晚晚喺唔再神秘嘅Red Room玩親密遊戲,「動作場面」絕對係三集之中最激,最令你坐立不安,真係睇到面紅,好彩我睇嗰陣隔籬無人坐。(剛上映)

上集講到,格雷同安娜之前因為男方嘅前任服從者而經常有爭拗,感情膠着之際,格雷坐直升機發生意外,女方嚇到癲,最後死過翻生嘅格雷喺Birthday Party上宣佈同安娜訂婚。大結局一開場,好好笑容嘅格雷同笑得好甜嘅安娜結婚,瞓醒互叫Good Morning,然後搭私人飛去度蜜月,去巴黎踩單車,去尼斯玩水上電單車,再搭私人遊艇喺海中浪漫漂流,靚景加甜到暈氣氛,兩公婆黐到實玩到癲是常識。

浪漫地火辣辣

  電影改篇自同名情色小說,有睇開頭兩集嘅朋友大概了解戲中嘅焦點,即幾激嘅SM牀戲,但實不相瞞,今集SM場口較之前兩集少,但兩人發自內心、突然有Mood、瞓醒得閒或者女方激嬲男方,兩人都會有「動作」場面,仲要「接觸面」都幾深入,火辣得嚟好浪漫,我覺得好好睇喎。

霸氣格雷夫人

  第一集嘅安娜係清純學生妹,緊張會咬筆又會唔識講嘢,但經過格雷嘅用心調教,當年玉女已進化成慾女,格雷夫人不再驚青,仲要非常有Power,見到姣騰騰嘅牛鬼蛇神黐住老公會出口閘住,又會主動用雪糕情挑老公,甚至突然Mood到喺公眾停車場騎住老公,見證安娜嘅進化,好精采。片尾安娜嘅回憶亦好感動,特別感激「格雷系列」貢獻咗超多好歌,多謝晒。

撰文︰廖思慧

hd