頭條戲場——《人肉搜尋》聰明老竇用滑鼠去解謎

        如果你有仔女、如果你好鍾意上網交朋結友、如果你經常流連互聯網,呢套戲非常啱你睇,你以為有圖有片一定有真相?你點解信網友都唔信屋企人?如果你行得正企得正,點解喺私人電腦進出任何網上交友平台都要Log Out?編劇功力超強,劇情抽絲剝繭估佢唔到,睇緊覺得緊張,睇完覺得興奮,記住不要隨便相信邪惡的網友。(10月17日上映)

        因為16歲女兒Margot(Michelle La飾演)突然音信全無,單親老竇David Kim(John Cho飾)登入女兒的電腦嘗試透過facebook、Instagram、Twitter、電郵及訊息記錄等線索來尋找女兒的下落。自以為同囡囡關係好Close嘅David愈查愈唔對路,愈查愈覺得事有蹊蹺,更驚覺自己原來唔了解囡囡。

  片長102分鐘,全片均以單親老竇視角出發,所以即使畫面唔見佢,都要令觀眾感受到佢嘅視角及思維,即滑鼠移動去按一個按鈕時,是移得很慢還是很快,定係猶豫,看似細微嘅動作但對了解故事及主角個性非常有用,首拍長片嘅Aneesh Chaganty導演好嘢。據知電影只拍攝了13日,但後期做了兩年,從電影中一切網上社交平台界面可見,逼真之餘仲做足資料搜集,從Friend List、Update時間、Like數量到Search History都包含大量有助搵Margot訊息。電影構思過癮,剪輯亦相當特別,最重要係對虛偽嘅網絡世界作出極狠嘅諷刺。

撰文:廖思慧

hd