頭條戲場——《SUNNY陽光姊妹淘》不斷想當年代表你老了

        改編自韓國同名大熱感人電影,由多位不同年代的當紅阿姐如篠原涼子、友坂理惠、廣瀨鈴、渡邊直美及小池榮子等主演。當年韓版好好睇,日版劇情大致相同,只係無韓版有關街頭社運活動,而加重閨密相處引你笑及惹你喊情節。電影開始無耐一班朱古力學生妹唱跳久保田利伸的《LA‧LA‧LA LOVE SONG》,首歌係96年神級日劇《悠長假期》主題曲,然後我不斷想當年,嗚。(11月22日上映)

        電影帶你回到90年代,奈美(廣瀨鈴飾)由鄉下搬到市區住,因為又娘又土被同學欺凌,全靠大膽又有義氣的芹香(山本舞香飾)出手解圍,癲喪高中生五人組自此加多一人,更組成閨密團「Sunny」,一齊跳舞一齊影貼紙相,總之返學一齊,放學一齊,拎住簡易菲林相機日影夜影。當年小辣妹必備行頭有Alba Rosa、Hysteric Glamour及富士相機,因為年代久遠,唔少產品已經絕跡市面,戲中道具全是劇組經二手店及停產庫中辛苦刮番嚟,有啲絕版珍藏更是由曾經是小辣妹的工作人員借出,睇戲同時仲可以畀你懷念舊潮物。

人生就是非常無奈

  畢業後20年,已成家庭主婦嘅奈美(篠原涼子飾)喺醫院遇到患重病嘅舊友芹香(板谷由夏飾), 因為時日無多,芹香好想跟「Sunny」重聚,拜託奈美努力尋人。其間,時空不斷交錯,你好想知當年會同阿伯約會再要對方買名牌嘅人會變成點,從奈美尋人你會感受到人生嘅無奈。電影圍繞90年代發生,音樂當然亦要配合,導演大根仁即刻諗起90年代J-POP教父小室哲哉,然後TRF同安室奈美惠嘅歌貫穿全片,睇完當晚已即上YouTube重溫。

  電影玩懷緬玩回憶最易有共鳴,會笑會喊會感懷,就算幾靚仔嘅初戀情人最後都會變大叔,唉。

撰文:廖思慧

hd