頭條戲場——《無敵破壞王2:打爆互聯網》 好多高潮好黐線呀

        2012年,《無敵破壞王》憑驚喜陳年電玩題材全球勁收4.7億美金票房,更得到奧斯卡及金球獎「最佳動畫」提名。今年聖誕,勁嘢回歸,破壞王同雲妮露離開街機再衝出機舖,勇闖恐怖又無邊際的網絡世界,一入「網門」深似海,兩位連「WiFi」都未聽過嘅朋友要在數以億計嘅網站中遊走,動畫加網絡已估計可以玩到幾癲,但入場後發現使唔使癲得咁緊要?全片高潮位勁多又密集,睇到一半已被我納入今年最愛電影頭三位。

電影由迪士尼《魔雪奇緣》及《優獸大都會》最強班底炮製,再由《無敵破壞王》及《優獸大都會》金像導演Rich Moore執導,見到呢堆動畫名都知信心保證,而《無敵破壞王2》已入圍奧斯卡最佳動畫提名,同《超人特工隊2》及《犬之島》等癲嘢齊爭大獎,絕對有得鬥。

唔想消失唯有搏命

  因為雲妮露的主場「甜蜜大冒險」街機出咗問題而熄機,喺回收佬出現之前搵唔到適合零件,遊戲將成歷史。雲妮露知道絕版零件喺ebay有得Bid,佢同破壞王決定向網絡世界出發,天真地以為去到ebay,就會得到件貨,完全唔知世上有錢呢回事。兩條「Game燦」乜都唔識,好彩遇到好心網民及KOL幫拖,識到朋友之餘仲解決到唔少問題,兩人嘅友誼更昇華咗幾十層樓咁高。

網上世界繽紛過癮

  電影最過癮係將互聯網影像化,你會睇到點收發郵件,聽到搜索相關詞忍唔住笑,仲有彈窗廣告及畀Like留言等,仲有無數咁多網民嘅爆笑網上行為,以及話你知上網第一法則,上過網嘅都會睇得好歡欣。

  彩蛋好多,驚喜不絕,迪士尼人物排住隊湧住出場,有版權就是任性,公主同場系列堪稱經典,你點會諗到一班各有魔法嘅公主會圍埋一齊仲要玩瘋狂自嘲,笑自己一講起夢想就要唱歌,仲有盞燈照住你,又呢又路,屬全片最高笑點,睇到我唔捨得散場。輕輕一提,戲院唔開燈唔好走住。(剛上映)

撰文:廖思慧

hd