頭條戲場——《失驚無神一家人》從來都話做父母要考牌

        「你有能力生小朋友,唔代表你有資格做人父母,從來都話做父母要考牌。世上太多衰老母賤老竇,會虐打會性侵甚至殘殺親生仔女,其實死刑是必須的。」電影改編自真實故事,是編導兼監製Sean Anders 的親身經歷。一夜間,Pete(Mark Wahlberg飾)同Ellie(Rose Byrne飾)由二人世界變成三個小朋友嘅父母,做父母難,做領養父母更難,做領養15歲反叛少女嘅父母更難上加難。(剛上映)

        Pete同Ellie努力為事業奮鬥,人到中年終於儲到個錢,但原來已去到「高齡」父母條死線,為免同仔女年齡相差太遠,亦減低同仔女玩而猝死嘅機會,唔生是保命好方法。

  領養喺美國好普遍,男女主角覺得做父母其實唔難,加上聽到被領養嘅過來人發表感人偉論,被感動沖昏頭腦,揀咗個15歲反叛少女,阿媽係資深毒友,然後仲養埋少女嗰兩位各有缺憾嘅細佬妹,零變三,加上失晒控,完全估計到Pete同Ellie有幾後悔。但電影話你聽,愛可以戰勝一切,亦可以解決所有深層次問題。電影屬典型美國家庭式喜劇,條橋係老土嘅,但笑點好多同幾高質,唔覺唔覺又整到你眼濕濕,反叛囡囡Lizzy(Isabela Moner飾)有演技有身材仲要好靚,輕輕鬆鬆個幾鐘,幾好吖。

  Isabela能夠參與拍攝全靠Mark,事關兩人曾於《變形金剛:終極戰士》中合作,後者向製作團隊大力推薦極具藝術天賦嘅前者。芳齡17歲嘅Isabela亦好識做,先佩服編導Sean Anders花盡心思嘅劇本,又指Mark同Rose無論戲裡戲外同樣風趣幽默,喺片場零悶場。編導兼監製Sean Anders指Lizzy角色是以真實人物作藍本,絕對有血有肉。

撰文:廖思慧


hd