頭條戲場——《星仔打官司》 有情有義曱甴俠

        電影榮獲奧斯卡及金球獎最佳外語片提名,亦奪得康城影展「評審團獎」及「人道精神大獎」,童星Zain更憑本片勇奪土耳其安塔利亞金橙電影節最佳男主角。電影開首,12歲但身形似8歲的敍利亞難民Zain (Zain Al Rafeea飾)要控告父母,原因係生咗佢又唔養佢,佢喺庭上講,「無辦法養仔女嘅父母,唔好生仔。」擲地有聲。其實窮唔好生、唔識教都唔好生,每逢有小朋友喺公眾地方做錯嘢俾人鬧,啲父母永遠只會拋下一句「他只是個孩子啊。」,難聽過租口。(3月7日上映)

Zain有好多兄弟姊妹,因為窮,佢同細佬妹無書讀,自細就要做嘢賺錢養家,阿哥同表哥全部坐緊監,有瓦遮頭三餐唔使愁,父母心諗非常好,擁有如此思維,點會正常?所以父母上庭時覺得被個仔告好無辜,認為自己細個「都係咁啦。」所以覺得個仔點解要怪佢?

  因為最親嘅妹妹Sahar(Haita 'Cedra' Izzam飾)出事,Zain離家出走,得到單親媽媽兼黑市女工Rahil (Yordanos Shiferaw飾)照顧,Zain享短暫母愛。有一日,Rahil失蹤,Zain負起照顧Rahil BB Yonas的責任。電影以倒敍方式講故仔,先以Zain在法院提告父母作開頭,再以Zain視角講出如何在如地獄的社會中求存,過程中法官與Zain和父母的對話畫面不斷穿插,導演無作出任何批判,睇吓睇吓,會由好憎Zain父母變到好同情。

  最後必須要講,Zain本身亦是難民,文盲,零演出經驗,但佢演活一個在亂世地底頑強掙扎,勇敢保護妹妹同做稱職保姆嘅曱甴俠,時而堅定時而絕望嘅眼神,超有戲。

撰文:廖思慧


hd