頭條戲場——《蘇格蘭女皇:爭名奪后》血脈沸騰心理戰

        我為飾演瑪麗女皇的Saoirse Ronan入場,人又靚演技又好,無論有權有勢定被背叛時,眼神依舊充滿勇氣同執着,將一個為咗保持王位而結婚生仔,然後被老公、兄弟及戰友出賣嘅寂寞女皇演繹得啱啱好,爛番茄評價好一般,話悶呀、戲服唔靚呀,我覺得戲服、場景、構圖同燈光都好出色,好似睇緊一幅幅油畫,對白亦好一針見血,瑪麗女皇及伊利沙伯女皇為爭皇位嘅心理戰最好睇,細膩又引人入勝。(3月14日上映)

        電影由《孤星淚》《霍金:愛的方程式》金像級監製,根據暢銷傳記改編,金球影后Saoirse Ronan飾演對英格蘭王位虎視眈眈的蘇格蘭女皇Mary Stuart,Margot Robbie則飾演將自己活成一個男人,怕被另一半奪走王位,唔願結婚生育的伊利沙伯女皇。有親戚關係的雙后惺惺相惜又互相忌諱,不斷書信來往心理角力,你進我退,然後一句說話就完全釋懷,完美地解構雙后性格。

  戲中有幕雙后見面的戲份,但歷史並無證據顯示兩人有見過面,過往有好多劇作家一直想象「會晤」的情景。而Ronan及Robbie對拍攝見面戲份非常難忘。Ronan說,「我哋決定即使化好妝,但埋位前儘量唔好見面。經歷幾星期對戲排練及三個星期的拍攝,面對面嗰刻,實在有一種難以言喻嘅震懾感,唔單只激動流淚,更有『離魂』感。能夠同另一演員有咁強烈嘅交流,令我難忘。」而Robbie續說,「係我演藝生涯最難忘嘅一日,拍攝期間,我哋從未試過上妝後碰面,而嗰場係我最後一日拍攝,令我有一種既震撼又忘我嘅感覺。」

  另外,開拍前,演員要跟歷史學家上堂,亦要接受肢體及舞蹈訓練,因為導演希望演員能夠用身體語言來代替對白,表達說話以外的感情。另監製及導演強調實景拍攝的重要性,所以觀眾會見到蘇格蘭地標,如Gloucester Cathedral及Hampton Court等,教堂更是瑪麗被處決前被囚的地方。一眾演員全妝連古裝服飾,加上馬匹及武器去到郊外地方拍攝,非常大陣仗。

撰文:廖思慧

hd