頭條戲場——《密室逃殺》九成時間驚得幾爽

        六個陌生人收到神秘邀請參加頂級密室逃脫遊戲,生還者有一萬蚊美金獎金,過唔到關嘅全部都要死,設局者係一個黐線佬,因為唔抵得六個陌生人太好運而想測試佢哋是咪真係咁好運。唔好諗為一萬蚊美金值唔值?唔好諗個黐線佬搞場大龍鳳為乜?試吓唔好帶腦入場。電影片長99分鐘,九成時間睇到想叫出聲,驚驚加緊張,睇得幾爽,適合一班朋友一齊睇。(剛上映)

        話明密室逃脫遊戲,當然有好多置有機關的密室。有會發熱,變成超大殺人焗爐嘅火焰會客室、凍到你驚嘅冰極世界寒冰房、乜都倒轉隨時墮樓嘅倒轉桌球室、起你底放毒氣嘅恐怖手術室及用幻覺呃鬼你嘅旋轉門。要過關就要解謎,解謎方法好多樣化,感激導演Adam Robitel 菩薩心腸,角色設定無蠢人,唔會睇到嬲,唔該晒。

  全片重點係密室,特效設計師Max Poolman透露建造密室場景前,會先用3D技術作模擬,並將效果展示給美術指導、攝影師和特技組參考,以便各人互相配合。而開拍前,演員要接受特技總監安排的訓練。如為配合倒轉桌球室的爬書架訓練,攀爬、腳踏軌跡及落點都經由劇組精心設計,但最難係明明經過刻苦訓練,但演員拍攝期間要隱藏對場景嘅熟悉,即要扮作首次攀爬,演上演確實難。

  飾演密室逃脫愛好者的Nik Dodani要在軍事基地的游泳池參與Frog Squad水上運動隊的訓練,學習潛水技巧及練習如何在安全的情況下浸親。

撰文:廖思慧

hd