頭條戲場——《炸雞特攻隊》由開場哈哈哈到完場

        嗱,我哋嚟睇數據,韓片《炸雞特攻隊》自本年1月23日在韓國上映後,累計觀影人次已逾1,620萬,成功超越《與神同行》同《屍殺列車》等勁片。電影無億億聲嘅特技製作,亦無千軍萬馬嘅製作班底,純賣肯用心加用腦及計算非常準確嘅故仔,笑料Keep住有,無呃你,我由開場笑到散場,臨尾大玩80年代港片經典場面,張國榮那首堪稱永恒的電影主題曲,睇到內心好澎湃,絕對是近十年最佳警匪喜劇。(3月28日上映)

緝毒組五位地獄黑仔王空有一身好武功,破案率其低,被上司嚴重嫌棄,解散日子不遠,為爭口氣又好為做場好戲都好,收到絕密毒料的高隊長(柳承龍飾)率領下屬到疑似黑幫地盤對面的「啃得雞」炸雞店監視,打躉打到炸雞店都執笠,隊長把心一橫接手繼續任務,估唔到賭仔組員馬仔(陳善圭飾)炸出一手好雞,店舖客似雲來,緝毒組變炸雞組,收錢收到忘記任務,組員想放棄當差轉行賣雞時出現大逆轉。

韓國觀眾求食譜

  戲中被食客瘋狂打卡嘅招牌菜「水原牛肋排炸雞」成為電影名物,由於是編劇自創菜式,坊間無得賣,大量韓國人睇完電影後瘋狂查詢,因為群情實在太洶湧,劇組唯有公開食譜,有韓國YouTuber試整過,味道非常OK咁話,想學嘅讀者麻煩自己上網睇,喺度寫會被鬧呃版位。

演員上堂學斬雞

  因為身兼警察加炸雞店員兩職,所以五位演員要同時進行兩組訓練,分別是動作及煮食訓練。

  戲中負責斬雞、醃雞同炸雞的陳善圭,開拍前一個月就去學切菜,挑雞骨及炸雞等等,最後更成為「炸雞達人」。他表示:「為角色希望盡多啲努力,喺煮食方面,用心嘅刀功就係基本功,所以練習咗非常長嘅時間。」而幫助馬仔處理各種食材嘅助手少爺勳(孔明飾)亦私下買咗大量洋蔥再努力喺屋企練習切洋蔥。

導演係周星馳Fans

  導演李炳憲功力深厚,佢一直奉行「笑聲可以安慰生活」嘅宗旨,所以一開始就將電影定位為「一定要好笑」,事實佢完全做到。第一次挑戰純喜劇題材嘅導演是周星馳鐵粉,「從小就睇佢嘅喜劇長大,我希望呢部戲能夠帶畀觀眾好似80、90代香港電影嘅幽默感同精采打鬥。」

撰文:廖思慧

hd