頭條戲場——《三夫》真心想向曾美慧孜致敬

        等了18年,陳果的「妓女三部曲」終於去到最終章,由黑龍江女子來港賣淫後回鄉過好日子的《榴槤飄飄》,到內地妓女已融入香港生活的《香港有個荷里活》,《三夫》則講三個窮男人共侍一妻,更以船載住老婆到港珠澳大橋下賣淫,只睇文字你會覺得離譜,睇完套戲你會明白無可奈何。好多人話電影有大量政治隱喻,我唔太睇得出,亦唔想深究,做香港人已經好攰,我當入場睇套超三級Cult片。溫馨提示,對魚類有特別偏好及視性愛如洪水猛獸的慎入場。

傳聞在海上被捕獲的小妹(曾美慧孜飾)性慾異於常人,只要Mood到,食食吓飯都想要,因為同老竇亂倫生下兒子,又因為第二任老公太老無法滿足小妹,第三位老公四眼佬(陳湛文飾)就出現。四眼佬住公屋,接小妹上樓,但來自大海的小妹活得唔開心,情願繼續喺小船做妓女。

  新聞稿咁樣寫,「衝擊香港最大膽性愛尺度奇情三級片!大量超乎想像、幾近荒誕、挑戰道德尺度的性愛場面。」而對於全片有九成時間無着衫嘅曾美慧孜,陳果導演咁樣講,「這個角色不是普通妓女,全世界的妓女電影都沒有這種。這是一部不正常的情慾片!」

  的確,《三夫》唔易啃,因為性愛場面好多好多好多,多到你會有好多刻懷疑自己睇緊啲乜?睇訪問知道曾美慧孜為部戲增肥30磅致停經,月事下仍要拍情慾戲,加上全片長期處於全裸狀態,與戲中八成男演員,無論是要角還是閒角都有肉搏場口,散場後,腦海全是啪啪聲嘅我只想向曾美慧孜致敬。

(剛上映) 撰文:廖思慧

hd