頭條戲場——《5時恭候的證人》埋沒良心你估易㗎

        電影歸娟為驚悚加劇情類,講真唔算太驚悚,因為女主角金香起實在太可愛。港產劇同電影經常有法庭戲份,但韓國導演硬係拍得特別啲,懸疑加人性加親情加友情加為弱勢社群發聲再加令人感動嘅覺醒。做好人其實唔難,做壞人先最難搞,你估埋沒良心咁容易?

戲中淳鎬(鄭雨盛飾)是一宗殺人案被告的辯護律師,殺人案唯一目擊證人是有自閉症的中學生智友(金香起飾),被告是一個照顧老僱主多年的女傭,街坊唔信女傭殺僱主,女傭聲淚俱下表示老僱主有心自殺,上到法庭,無人願意聆聽智友嘅口供,陪審員認為案件無可疑,被告同淳鎬好開心,後者更因為Win咗場官司獲老闆賞識,升做合夥人為權貴服務,搵更多更多嘅錢。

  唔記得講,入行初期,淳鎬係熱血民權律師,有理想有抱負,因為家人而孭上一身債,放棄理想進入一間專打商業案件嘅律師樓,為權勢護航,所以被多年老友鄙視,連佢自己都睇唔起自己。做人最慘莫過於想做壞事但良心過意唔去,男神鄭雨盛對所演角色了解好深,「我理解佢喺電影一開始時處於一個迷失及自我懷疑嘅狀態,我諗自閉證人案件令佢尋回做律師嘅使命感,佢亦從中覺悟到信任和溝通的真正價值,係一個搵返自己同被療瘉嘅過程。我亦希望電影能令觀眾有被療瘉嘅感覺。」

  一套善良又溫馨嘅電影,但當中有個幾大嘅Bug,真相及職業操守,邊樣重要啲?

(剛上映) 撰文:廖思慧

hd