頭條戲場——《孟買酒店》散場後如刧後餘生

        斯里蘭卡連環爆炸案增至359人死亡,酒店亦曾遇襲,《孟買酒店》此片其實亦改編自2008年轟動全球的孟買連環恐襲事件,不久前,紐西蘭基督城清真寺亦發生槍擊恐襲,電影因為題材敏感要緊急下架延期上映。世上無一處地方安全,你亦唔知自己有幾多歲命,做人要對得住自己對得住人,同埋愛要及時。(上映中)

        2008年11月26日晚上,孟買市中心多處地方遭恐怖分子襲擊,最後混入五星級豪華酒店「泰姬陵酒店」,並逐層展開屠殺。數百旅客及員工被困,由於當地無特種部隊,要等馬德里特種部隊坐八小時車到達幫拖,被困員工非常焦急,眼見恐怖份子放火燒酒店實行一鑊熟,酒店主廚及侍應Arjun(Dev Patel飾)率領自願留守的員工,冒生命危險協助旅客逃出生天。

  《孟買酒店》這齣電影由真實事件改篇,打咗底,所以一開場已經有啲坐立不安,因為你將會身歷其境一次超級恐怖嘅血腥大屠殺。一班回教少年信徒被Big Boss煽動,因為仇富就拎住一堆槍及炸彈見人就殺,真係兜頭兜身開槍,嘭嘭嘭嘭足全片。酒店美國旅客David(Armie Hammer飾)一家三口加保母屬電影重點,阿爸為救女放低個老婆,老婆諗諗吓情願一齊死都唔想一個人;加上屬世界最多人口之一嘅城市竟然無自己嘅特種部隊;最後,竟然有等待逃生嘅住客接受記者訪問,自爆藏身地令恐怖份子大怒再開殺戒。身處危急關頭必可見人性光輝,有人願意捨身救人,有警察心急如焚冒危潛入酒店營救,願世上再無恐襲。

撰文:廖思慧


hd