頭條戲場——《POKÉMON神探Pikachu》好想抱走Pikachu

        對《寵物小精靈》(官方譯《精靈寶可夢》)一直無感,之前玩過Pokémon GO亦三分鐘熱度, 但睇完《POKÉMON神探Pikachu》呢套真人加動畫加奇幻加懸疑電影後秒速入坑。戲中有超大量小精靈現身,成身毛毛好有戲嘅Pikachu得意到黐線,加上英語版由Ryan Reynolds聲演,即係死侍聲線同語氣嘅Pikachu,Well,完全係治瘉系電影。電影根據遊戲《Great Detective Pikachu》改編,神探Harry Goodman遇意外後神秘失蹤,其兒子Tim(Justice Smith飾)決查出真相,喺老竇的Pokémon助手Pikachu及記者女神Lucy(Kathryn Newton飾)協助下去萊姆市展開調查。

  製作團隊製作眾多Pokémon,除主角Pikachu,仲有配角傻鴨(可達鴨)同一大堆小精靈如吸盤小丑(魔牆人偶)、大舌頭、卡拉卡拉、卡比獸同布魯等等。在製作3D的過程中更要計算角色的高度和闊度。此外,亦花好多心思令Pokémon唔會過於卡通化,同呈現出真實感。

不能太卡通化

  另外,電影大部份都在英國及蘇格蘭實地拍攝。戲中一幕森林地動山搖屬全片最精采,男女主角更為此幕專登去學潛水,因為兩人將會被震落海,場面好驚險。為Pikachu加添超強幽默感的Ryan Reynolds表示:「神探Pikachu有啲粗魯,亦好有個性,係一個厲害嘅角色。佢外表似個細小嘅棉花球。試諗吓有人將我縮細再注入呢隻黃色Pokémon入面,效果就係咁樣。我試過為CG角色配音,但從未試過咁大規模嘅互動。當你喺大銀幕見到呢隻Pikachu,你覺得可以摸到佢,但千祈唔好抱佢,我估計唔到佢嘅反應。」黐線,我就係好想抱。(剛上映)

撰文:廖思慧

hd