頭條戲場——《去吧!女神兵團》 沉迷做兵等如倒錢落海

        歌仔都有得唱「條女很清楚收兵好過嫁人」,「娘娘收兵」全宇宙都發生緊,在泰國勁破《出貓特攻隊》票房,19年泰國賣座冠軍的《去吧!女神兵團》就係講女神與兵仔嘅愛情故事。世界上最遙遠的距離就是Friend Zone,當然能成為密友大概總帶着愛,老實講,故事情節其實好簡單,屬於睇完預告就估到結局嘅電影, But靚人加靚景加過癮笑料,故仔又甜又暖又好笑,男主角Nine亦非常靚仔搞到我成日掛住睇佢睇唔切字幕。(剛上映)

        男主角阿柏(Nine飾)同女主角阿靜(平采娜飾)由中學開始已好Friend,兩人出雙入對,日見夜見,爭一步就可以成為戀人,但女嘅為怕日後分手連朋友都無得做,將阿柏踢入「朋友區」,男嘅不斷陪女方捉姦,女嘅有事只懂叫男方幫手,完美演繹做兵像小狗,主人一叫馬上就到。

平采娜唔會捉姦

  對於戲中男女角情況發生在自己身上,好靚嘅平采娜接受本報訪問時表示絕對唔會行前一步,只會繼續做朋友。而在戲中飾演阿靜偷食男友嘅Jason就好勇敢,笑言人一世物一世,唔理喇,梗係拍拖啦。而對於做兵,Jason說:「當然有得揀,梗係唔好做兵啦。」戲中阿靜經常要阿柏陪佢捉姦,問到如Feel到男友有「景轟」時會點做?平采娜笑言:「唔會咁辛苦去捉姦,亦唔會玩篤爆,會等男方主動同佢講,亦好想聽吓佢會唔會講大話。」

導演認有被虐狂

  問導演點解會拍女神與兵嘅故事,原來係因為親身經歷,個樣好似學生哥好老實又有啲呆嘅導演查亞諾布帕拉科做兵做咗13年,目前仲做緊,問導演是否有被虐狂?佢坦白直認,非常好嘢。「唔會踏出Friend Zone,亦唔會表白,知道講咗結果亦一樣,情願繼續做兵,起碼仲可以繼續見到。」各位兵友是否很有共鳴?再問導演電影在泰國大收原因,導演諗都無諗就答,「因為預告片剪得好精采又捉到重點,好搞笑,好吸引。」導演為人坦白又老實,做朋友真係一流。

採訪:廖思慧 攝影:張詠森








hd