頭條戲場——《再見亦是狗朋友2》有洋葱亦有蜜糖

        兩年前上映的《再見亦是狗朋友》搞到我哭崩戲院,曾經歷寵物離世的人自會明白至愛毛孩「畢業」嗰種痛不欲生,點解明知會睇到喊仲要入場?舒緩囉,治癒囉。講貓狗嘅電影一向大把市場,所以造就《再見亦是狗朋友2》上映,配方一樣,但多了描述親情及愛情,催淚強度較上集低,但依然睇到好感動。(下周四上映)撰

電影跟上集同樣改編自暢銷小說,作者兼電影編劇卡梅倫透露故事靈感全因當時嘅女友(現在老婆)痛失愛犬,為安慰她於是寫了一個關於狗狗不斷輪迴重生及重遇主人的故事,並開始思索狗狗出現的意義。

  卡梅倫老婆講起仍然感觸良多:「佢一邊駕車一邊講故仔,我喊到收唔到聲,但我喊住同佢講:『呢個故事能夠安撫好多人,你一定要將佢寫成書。』」感動全球數百萬讀者嘅暢銷系列因而誕生。電影延續上集故事,狗仔貝利經歷咗幾次轉世,最終又返到主人伊雲(丹尼斯奎爾飾)身邊,守護原主人幾十年,今集就轉咗老細,就係照顧伊雲的孫女思希(嘉芙蓮佩史葛飾)。貝利之後輪廻轉世為莫莉同麥斯一直陪住思希成長,行過高山低谷,甚至幫佢搵到男朋友。

  眾生皆平等,請大家尊重生命,可以不愛,但請不要傷害及遺棄動物。

文:廖思慧


hd